Duha ka mga managsuon nangamatay sa aksidente sa highway sa Sitio Colonia, Barangay Ilihan, lungsod sa Tabogon, amihanang Sugbo alas 4:19 sa hapon sa Huwebes, Abril 26, 2024.
Giila ang mga biktima nga sila si Emman Pekit-Pekit, 18, grade 12 sa Tabogon Roosevelt High School ug iyang 13 anyos nga igsuong babaye nga si Eunice, grade 7 student.
Si Police Captain Florencio Cabanlit Jr., hepe sa Tabogon Police Station, nitug-an sa Superbalita Cebu nga ang mga biktima sakay sa motorsiklo mopauli sa Barangay San Jose, lungsod sa Borbon gikan sa tunghaan dihang nabanggaan sa gikasugat nga Isuzu Elf truck nga gimaniho ni Ferdinand Pepito, taga Barangay Calambua, San Remigio.
Matod sa kapulisan nga base sa ilang imbestigasyon, kusog ang pagpadagan ni Emman ug gikatahong nikawat sa pikas lane samtang nagmaniobra sa kurbadahon nga dan.
Ang mga biktima nga wala mag-helmet nakaangkon og mga samad sa ulo ug bali sa lawas human nangalagpot tungod sa kusog nga impact.
Gidala sila sa Cebu Provincial Hospital sa Bogo City, apan gideklarar nga patay na.
Sa laing bahin, si Pepito nitahan sa kapulisan ug gipriso samtang nagpaabot sa mga kaso nga ipasaka batok kaniya.
LAING DASMAG
Manag-uyab nangaangol human nadisgrasya ang ilang motorsiklo nga gisakyan alas 5:00 sa buntag, sa Biyernes, Abril 26, sa Maracas, Brgy. Lahug, dakbayan sa Sugbo.
Mga biktima giilang sila si Nelson, 24, nagmanaeho sa motorsiklo, taga dakbayan sa Lapu-Lapu ug iyang uyab nga si Abigail, 18, taga Lapu-Lapu City.
Lakip sa naangol ang drayber sa usa ka ride-hailing app nga nag-estambay nga nadasmagan sa motorsiklo sa manag-uyab.
Silang tulo gidali sa pagdala sa tambalanan.
Sa initial nga imbestigasyon sa Traffic Enforcement Unit (TEU) gikataho’ng kusog kaayo ang pagpadagan sa duha sa ilang motorsiklo dihang nasaghid kini sa ni-u-turn nga laing motorsiklo.
Ang motorsiklo sa manag-uyab nalahos ngadto sa gipang-park nga motorsiklo ug multicab. Giingong gikan ang manag-uyab sa Gaas, Balamban atol sa hitabo. / GPL