Nadakpan ang duha ka menor de edad ug usa ka construction worker samtang padulong manuyop ug nakuhaag shabu alas 10:50 sa gabii Miyerkulis August 13, 2025 sa Sityo Ybañez Compound, Barangay Mambaling, Dakbayan sa Sugbo.
Ang nasikop mao sila si alyas John, 16, taga Sityo Tayud, Barangay Cogon Pardo, Cebu City, si alyas “Joey”, 16, Grade 6 Student, ug si alyas “Clifford”, 21, ulitawo construction worker, pulos taga Alumnus St , Basak San Nicolas, Cebu City ug gipangtangong sa Mambaling Police Station.
Ang kapulisan nirespondi sa dapit human nakadawat og report kabahin sa pagpangawat.
Sa pag-abot sa dapit naaktuhan ang tulo nga nagkupot sa tagsa ka pakite nga shabu.
Giingong ang tulo padulong manuyop.
Samtang, napusasan ang usa ka construction worker uban sa kakunsabong trisikol driver atol sa buy-bust alas 11:26 sa hapon Martes August 12, 2025 sa Barangay Poblacion, Dakbayan sa Toledo.
Sila si Rubin Caballes, 39, construction worker taga Sityo Planta, Barangay Poblacion, Toledo City, Richard Candol Detomal , 32, dunay kapuyo trisikol driver taga Purok 3, Barangay Carmen, Toledo City, Cebu gitangong sa Toledo Police Station.
Ang duha nadakpan sa mga sakop sa Special Drugs Enforcement Units sa Toledo Police Station nakuhaag P3,400.
Maka-disposed silag drugas nga 5 gramos matag semana. / GPL