Gideklarar nga dead on arrival ang usa ka angkas sa motorsiklo nahitabong aksidente alas 2:30 sa kadlawon, Sabado, Oktubre 26, 2024, nahitabo kini sa highway sa Barangay Yati, Lungsod sa Liloan, Cebu.
Ang biktima giila nga si Cris Ivan Pasculado, 19, taga Purok Nangka, Brgy. Poblacion, Liloan.
Sa follow up sa SunStar Cebu pinaagi sa imbestigasyon sa kapulisan sa Liloan ubos sa pagdumala ni PMAJ Charlie B. Santiago nga ang biktima nag-angkas sa motorsiklo nga gimaneho ni Kim Flores, 19, ulitawo, taga Sitio Cogon, Brgy. Poblacion Liloan nga matod pa nagbiyahe paingon sa norte nga bahin samtang nagsunod ang laing nagmotorsiklo nga security guard nga si Arniel Deguiño, 28, ulitawo nga taga Bahak, Poblacion, Liloan.
Matod pa nga pag-abot sa nahisgutang dapit nagkasingkiay ang duha ka motorsiko ug gumikan sa kakusog sa impact ang angkas nga si Pasculado, nalabay punta sa kilid sa gutter.
Ang biktima unang gidala sa duol nga tambalanan sa Liloan ug gibalhin sa VSMMC, apan alas 3:30 sa kaadlawon Oktubre 26, 2024 nakabsan kini sa iyang kinabuhi.
Samtang ang duha ka drayber sa motorsiklo nga nakaangkon og minor injuries. Ang drayber nga si Kim Flores anaa sa kustodiya sa Liloan Police. / DVG