Walay kamatuoran ang nikatap nga video sa social media sa nilabay nga semana labot sa duha ka lalaki nga pasahero sa usa ka modern public utility jeepney kon MPUJ sa Liloan nga daling nanggawas diin ang caption sa nag-upload nagbutyag nga ang duha ka wala mailhing lalaki nanglabni og cellphone.
Human nikatap ang maong video ug niani og daghang shares ug komento sa social media, ang Mandaue City Police Office (MCPO) nihimo dayon sa ilang imbestigasyon.
Nakig-alayon usab ang MCPO ug ang Liloan Municipal Police Station sa management sa MPUJ.
Dinhi nasayran nga nahitabo ang maong insidente sa national highway sa Barangay Yati, Lungsod sa Liloan niadtong Mayo 8, 2025.
Base sa pamahayag sa driver ug konduktor sa maong MPUJ, walay nahitabong snatching kun dili usa kini ka panaglalis tali sa mga pasahero nga niresulta sa komusyon. / AYB
