Duha ka police personnel sa Police Regional Office (PRO) 7 ang gipasidunggan human sa gipakita nga kaisog atol sa ilang trabaho.
Ang duha ka polis nga gipangtauran og PNP Medal of Merit o Medalya ng Kagalingan mao silang Police Patrolman Rembrandt Sabandeja nga sakop sa Sawang Calero Police station 6 sa Cebu City Police Office.
Si Sabandeja gipusil kini makatulo ka higayon sa armadong lalaki sa dalan General Gines, Barangay Sawang Calero alas 4:15 sa buntag niadtong Hulyo 16, 2025, apan naluwas siya sa iyang gisul-ob nga bulletproof vest.
Nihimo og follow up operation ang kapulisan sa Sawang sa insidente sa pagpamusil-patay sa Barangay Suba diin ang suspek nga armado maoy gitudlo nga responsable sa krimen.
Human mapusilan si Sabandeja nibawos sa pagpusil ang mga polis nga niresulta sa pagkaigo sa suspek nga gidala sa Cebu City Medical Center apan gideklarar siya nga dead on arrival. Si Sabandeja nakaangkon ug bun-og ug garas sa dughan mugna sa impact sa bala nga niigo sa bulletproof vest ug gidala sa Regional Medical and Dental Unit 7.
Lakip sa gihatagan og pasidungog mao si Police Staff Sergeant Neil Talle sakop sa Compostela Municipal Police Station.
Si Talle niresponde og domestic disturbance alarm niadtong Hulyo 17, 2025 human nireklamo ang usa ka babayeng biktima apan sa iyang pag-abot sa dapit iyang nasugatan ang gireklamo nga nag-wild.
Human si Talle nga nagpailang polis, nikuha ang gireklamo og bato ug buot unta nga ilabay ngadto sa polis.
Tungod niini, gidumog kini ni Talle nga niresulta sa iyang pagkaangol apan nahimo pa gihapon niya nga napusasan ang gireklamo gamit ang iyang kusog ug gidala sa police station.
Tungod sa maong bayanihon nga lihok gidayeg sa hepe sa kapulisan sa Central Visayas nga si Police Brigadier General Redrico Maranan ang iyang duha ka personnel.
Matod ni Maranan nga angayan lang nga ilhon ug pasidunggan ang duha kay gihimo niini ang angayan nga himuon isip tinugyanan sa balaod bisan nabutang sa kakuyaw ang ilang kinabuhi.
“Their bravery and steadfast commitment to public safety, even in the face of danger, deserve our highest recognition. These officers serve as shining examples of the PNP’s dedication to protecting the Filipino people, no matter the cost,” matod ni Maranan. / AYB