AKTIBONG sakop sa kapulisan sa Mandaue nga giilang high value individual ang nasikop sa buy-bust alas 11:15 sa buntag, Abril 6, 2025 didto sa C. Padilla, Barangay Mambaling sa Dakbayan sa Sugbo.
Nasikop sa hiniusang operasyon sa kapulisan sa Police Regional Office (PRO) 7, Philippine Drug Enforcement Agency (PDEA) 7 ug Mambaling Police Station si Police Staff Sergeant Niesel Pescante, 33, minyo nga taga San Vicente, Liloan nga nadestino sa Station 6 sa Mandaue City Police Office (MCPO) isip desk officer.
Nakuhaan siya og gibanabanang 60 gramos nga gituohang shabu nga dunay market value nga P408,000, iyang PNP ID, 9 mm nga service firearm nga dunay magazine ug 14 ka bala ug ang iyang motorsiklo.
Base sa impormasyon nga nahipos, ang suspek dugay na nga nalambigit sa negusyo sa drugas apan nilaylo panahon ni kanhi Presidente Rodrigo Duterte.
Gipangitaan lang og tayming sa kapulisan aron masikop ang ilang kaubang polis nga nagnegosyo og drugas.
Kasamtangang gikustodiya sa PRO-7 ang dinakpan nga polis ug gitakda kining pasakaan ug daghang mga kaso.
Samtang laing polis nga nadestino sa Dakbayan sa Mandaue ang gidakop human nanumbag sa iyang gikasugat nga lalaki kay matod pa wa kini motubag dihang iyang gipangutana sa alas 4 sa buntag sa Lunes, Abril 7, 2025, sa Barangay Sapangdaku, Dakbayan sa Sugbo.
Ang suspek nga si Police Corporal Ivan Gabutan Labra, 31 anyos, taga Sitio Arcus, Barangay Sapangdaku nga nadestino sa station 3 sa Mandaue City Police Office, nabalhug karon sa Guadalupe Police Station.
Kasong grave threat ug physical injuries ang iyang atubangon.
Base sa imbestigasyon sa Guadalupe Police Station, nagkasugat ang suspek nga nakainom ug ang biktima nga si Nerson Rosaceña Almario, 32 anyos, taga Sitio Lupa, Barangay Sapangdaku, sa alas 4 sa kadlawon.
Duna kiniy gipangita nga tawo apan kay busy ang biktima wala niya kini matubag ug nidiretso lang siya sa paglakaw.
Dinhi na nasuko ang suspek og gisumbag ang biktima ug wala pa matagbaw gitionan sa dala niini nga armas nga sa iyang pagtuo didto nalang taman ang iyang kinabuhi.
Human sa hitabo, miadto ang biktima sa Guadalupe Police Station sa alas 7:15 sa buntag ug iyang gisaysay ang nahitabo kaniya ug pagka alas 9 sa buntag nadakpan dayon ang maong polis nga klaro pang nakainom.
Nakuha sa mga imbestigador ang 9mm pistol nga service firearm sa suspek ug mga bala niini. / VLM / AYB