2 ka pugante sa Alcoy nadakpan

Google map
Google map

Duha ka mga drug inmate nasikop pag-usab usa ka ad­law human sila nakaik­yas sa holding cell sa Alcoy Police Station niadtong Enero 1, Bag-ong Tuig.

Ang mga otoridad nga gipangulohan ni Alcoy Police Station Chief Captain Jerry Magsayo ni­himo sa manhunt operations nga niresulta sa pagkasikop nila ni Raymondo Amacna, 24, niadtong Martes, Enero 2, mga alas 8 sa buntag, ug Mark Anoling, 18, alas 11 sa gabii sa samang adlaw.

Si Amacna nagtago-tago ibabaw sa punoan sa Java plum, kun lomboy, dihang nadakpan siya sa kapulisan samtang si Anoling gitanggong sa Barangay Tabunok, dakbayan sa Talisay.

Sila si Amacna ug Anoling nakagawas sa prisuhan mga alas 8 sa gabii. niadtong Enero 1, 2024.

Matod ni Kapitan Magsayo, nangayo og mineral water ang duha kang Police Senior Master Sergeant Roel Abrio, desk officer on duty.

Apan dihang giablihan ni Ab­rio ang pultahan sa detention cell aron dad-on ang usa ka sudlanan sa mineral water, giingong gidasmagan ni Anoling ang polis ug daling miikyas gawas ni Amacna human nahagba si Abrio sa yuta.

Sila si Anoling ug Amacna sunodsunod nga nasikop sa managlahing anti-illegal drug operations niadtong Disyembre 13 ug 30, 2023.

Si Anoling nga gikahinabi sa SuperBalita Cebu nagkanayon nga iyang nabuhat ang pag-eskapo kay mahadlok siyang ibalhin sa Cebu Provincial Detention and Rehabilitation Center (CPDRC) kay iya unyang ikaabot ang iyang mga kaaway nga nangapriso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph