2 ka sakyanan nagbangga; 4 nangamatay, 3 samdan

2 ka sakyanan nagbangga; 4 nangamatay, 3 samdan
NAGUSBAT: Wa na mahitsura ang atubangan ning Toyota Innova human nabangga sa usa ka mixer truck sa Sabado sa kaadlawon sa Dakbayan sa Dumaguete. Upat sa mga sakay niini nangamatay. / TAMPO

Upat ang nangamatay ug tulo ang nangasamdan sa panagbangga sa duha ka mga sakyanan sa Sabado sa alas 4:50 sa kaadlawon sa Diversion Road, Purok 7, Brgy. Batinguel, Siyudad sa Dumaguete, Negros Oriental.

Base sa imbestigasyon sa Dumaguete City Police ubos sa direktiba sa ilang city police director nga si P/Lt. Col. Don Conag, nasayran sa Superbalita Cebu nga ang nalambigit mao ang usa ka mixer truck nga gimaniho sa usa ka 43 anyos nga lalaki, minyo, taga Brgy Tinago, Dumaguete City ug puwa nga Toyota Innova nga gimaniho sa usa ka 45 anyos nga lalaking minyo, taga Block 3, Bliss Compound, Mandaluyong City, Metro Manila.

Ang drayber namatay sa bangga. Ang laing tulo nga nangamatay mao ang iyang mga pasahero nga 59 anyos nga biyuda, taga Atura South Tanuan, Batangas City; 48 anyos nga ginang nga taga Block 3, Brgy Mauay, Mandaluyong City; ug babaye nga hamtong, minyo, taga 188K Guiho, Brgy Cembo, Makati City, Metro Manila.

Lakip sa sakay nga naangol mao ang usa ka menor de edad nga babaye nga taga 696 Block 3, Brgy Mauay, Mandaluyong City, nga confined sa Silliman University Medical Center (SUMC);

Laing naangol mao ang 15 anyos nga babaye, taga Block 3, Bliss Compound, Mandaluyong City, nga confined sab sa SUMC.

Laing lalaki nga ilang kauban nidangat sab sa samang tambalanan.

Matod sa kapulisan nga ang mga biktima sakay sa Innova padulong sa norte gikan sa habagatan.

Pag-abot sa kurbadahon nga bahin sa karsada, ang drayber sa Innova wa makaliko ug nikawas sa lane nga gisubayan sa gikasugat nga mixer truck.

Tungod niini nagkadinasmagay ang duha ka mga sakyanan.Ang drayber sa mixer truck naa na sa kustodiya sa Dumaguete City police. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph