Duha ka sunog ang miulbo sa managlahing dapit sa Dakbayan sa Sugbo nga nakaugdaw sa pipila ka mga kabalayan sa Dominggo sa kadlawon, Hunyo 29, 2025.
Unang nadawat nga tawag sa kabomberohan alas 1:52 sa kadlawon gikan sa St. Jude Acres, Phase 1, Barangay Bulacao, diin usa ka balay ang hingpit nga naugdaw.
Gikataho nga gipanag-iya ang maong balay ni Mark Steven Rizarri, nga giingong wala niadtong higayona sanglit duna kini gilakaw sa isla sa Camotes.
Lakip sa nasunog ang duha ka motor, sakyanan ug usa ka e-bike, apan luwas ra ang ilang binuhi nga iro.
Tungod kay dali ra kining girespondehan sa kabomberohan, napawong dayon ang sunog sa alas 2:34 sa kadlawon, human kini giisa sa unang alarma sa ala 1:57 ug nakontrolar sa alas 2:23.
Samtang sa pikas bahin, laing sunog mitumaw pagka-alas 2:45 sa kadlawon sa Tuada Compound, Barangay Tisa.
Ang maong sunog nakaapekto sa duha ka panimalay, diin ang usa niini hingpit nga naugdaw samtang ang usa partially lang.
Gikataho nga usa ka senior citizen ang naangol sa maong insidente nga nailhan nga si Antonio Delovio, 69 anyos, kinsa nakaangkon og first degree burn sa iyang likod ug tuo nga siko.
Hinuon, anaa na kini sa luwas nga kahimtang.
Ang sunog sa maong dapit nagbilin og danyos nga moabot sa P45,000.
Wa magdugay hingpit ra usab kini nga napawong.
Sa pagka-karon, padayon pang giimbestigahan ang hinungĀdan sa duha ka sunog. / JDG