Dul-an P100,000 ang giingong nasakiyo sa duha ka supervisor sa inilang gasolinahan human giingong kuwangan ang halin nga ilang gi-remit mga alas 8:30 sa buntag sa Dominggo, Agusto 17, sa may Salinas Drive, corner Laguardia, Barangay Apas, Dakbayan sa Sugbo.
Ang mga suspek nailhan sa alyas nga Boy, 38 anyos, lumad nga taga Negros Oriental apan kasamtangan nga nagpuyo sa B. Rodriguez Street, Capitol Site, Cebu City, ug alyas Lalay, 23 anyos, lumad taga lungsod sa Daanbantayan apan anaa karon nagpuyo sa dakbayan sa Mandaue.
Sa inisyal nga imbestigasyon sa Mabolo Police Station, giingong nagkasinabot ang duroha nga kuhaon ang kwarta gikan sa cashier's booth aron itapak sa ilang kuwang sa sales remittance.
Nasayran nga sa ilang third shift, dapat P77,089 unta ang ilang i-remit apan giingong P46,050 lang ang aktwal nila nga kwarta diin nagkuwang kini og P31,019.
Samtang sa ilang first shift, ang sales niabot og P78,276.75 apan P9,882 lang ang naremit diin kuwang kini og P68,387.45.
Dihang gitotal ang nawala nga kwarta moabot kini og dul-an P100,000, hinungdan nga gipadakop ang duroha sa management sa maong gasolinahan.
Kasamtangang gitanggong karon sa Mabolo Police Station ang mga suspetsado nga mag-atubang og kasong qualified theft. / JDG