Nagtingkagol karon sa bilanggoan sa Liloan Police Station sa lungsod sa Liloan ang duha ka mga giila sa kapulisan nga notadong carnapper ug manglungkabay og balay nga nasikop sa hot pursuit sa kaso sa pagpangawat.
Apan ang duha nadakpan pinaagi sa buy-bust sa mga sakop sa Municipal Drug Enforcement Unit sa kapulisan sa Liloan nga gipangulohan sa ilang hepe nga si Police Maj. Eric Gingoyon sa Brgy. Catarman, alas 7 sa gabii, Nobiyembre 30, 2023 .
Ang mga suspek nga nadakpan giila ni Gingoyon nga sila si Alyas “Bobet”, 38, lalaki, taga Purok Ube 1, Barangay Catarman, Liloan.
Samtang, ang ikaduhang suspek mao si Alyas “Mar”, 44, lalaki, taga Purok San Francisco 1, Barangay Yati, Liloan.
Nakuha gikan sa duha ka mga suspek ang ilegal nga drugas nga giputos sa duha ka plastic nga medium-sized ug 6 ka plastic mall-sized nga pakete nga gibana-bana nga motimbang og 10 ka gramos nga mokantidad tanan og P68,000.
Dugang pa niini, na recover usab sa duha ka mga suspek ang usa ka motorsiklo nga giingong gikawat sa maong mga suspek.
Kaso nga paglapas sa Sec. 5 and 11 sa R.A. 9165 o Comprehensive Dangerous Drugs Act of 2002 ug ang pagpangawat gihikay batok sa duha ka mga suspek.