Duha ka suspetsadong kawatan ang gisikop sa kapulisan sa Dominggo sa kadlawon, Hunyo 8, 2025, sa managlahing dapit sa Dakbayan sa Sugbo.
Unang napusasan ang 46 anyos nga si alyas Takyo, ulitawo, walay trabaho ug lumolupyo sa Upper Tabucanal, Barangay Pardo.
Nasayran sa imbestigasyon sa Inayawan Police Station nga gitiunan sa suspek og kutsilyo ang cashier sa usa ka convenience store sa nahisgutang dapit.
Mibutyag ang maong cashier nga nagtuo lang siya nga nagpasiaw lang ang suspek sanglit mikaratil kini og dagan human mideklarar og tulis.
Gikataho nga gawas sa walay nadagit ang maong tulisan, gidimalas pa gyud kini kay naatlan nga dunay nag-roving nga mga pulis nga miresulta sa iyang pagkasikop.
Nasakmit gikan sa dinakpan ang usa ka kitchen knife nga adunay gitas-on nga 8 ka pulgada.
Ikaduhang nadakpan ang usa ka 29 anyos nga e-bike driver nga giingong miunay og kawat sa cellphone sa iyahang best friend sa may Barangay Duljo Fatima.
Ang suspek giila sa alyas nga Janjan, nagpuyo sa nahisgutang barangay, samtang ang biktima mao si alyas Pedot, 25, usa usab ka e-bike driver ug suod nga higala ug silingan sa suspek.
Base sa imbestigasyon sa Sawang Calero Police Station, giangkon sa suspek ang maong salaod.
Matud niya nga natintal gyud siya tungod kay wala siyay kwarta nga ipalit og ligid sa iyahang e-bike.
Dugang niya nga iya kining ibaligya og ang halin maoy ipalit og ligid.
Nasayran nga narekober ra ang maong cellphone nga mokantidad og P11 mil.
Nangayo og pasaylo ang suspek sa iyang suod nga higala.
Nagpaabot pa ang kapulisan sa desisyon sa biktima kun mopasaka ba siya og kaso batok sa suspek. / JDG