Ang kagahob sa kasadya sa usa ka barangay Christmas party sa lungsod sa Pilar, mga isla sa Camotes sa Biyernes sa gabii, Disyembre 22, 2023 naputol tungod sa maduguon nga hitabo.
Nibanaw ang dugo sa gawas sa covered court sa Bry. Imelda sa nahisgutang lungsod human pamusila patay sa lalaking hubog ang duha ka mga barangay tanod.
Kini nahitabo samtang dunay presentasyon sa mga nag-party nga nakuhaan og video samtang madungog ang mga buto sa armas de fuego sa gawas sa korte alas 11 sa gabii.
Ang mga biktima nga tanod giila nga sila si Roger Cataros, 48, minyo, mananagat, ug si Benjie Alcala, 33, ulitawo, mag- uuma. Ang duha ka mga biktima managsilingan.
Samtang ang suspek giila nga si Rejie Navotas, 45, minyo, silingan sa duha ka mga biktima.
Sa imbestigasyon sa kapulisan sa Pilar Police Station ubos sa kamanduan sa ilang hepe nga si Police Capt. Michael Echavez, si Navotas giingon nga hubog nga nagsamoksamok sa party.
Nagsayawsayaw siya sa tunga-tunga sa covered court samtang nag-perform pa sa ilang dance contest ang mga nangapil sa party. Sila Cataros ug Alcala ningbadlong sa suspek.
Ang suspek, matod pa, nipa uli sa ilang balay apan pipila ka minutos nibalik sa covered court. Siya gisugat ni Cataros kay basin ug mosu’d og balik unya magsamoksamok na sab.
Wa nakabantay si Cataros nga si Navotas nagdala na diay og pusil nga wa matino ang kalibre, diretso nga namusil.Natumba ang biktima ug si Alcala nga nibarog sa iyang gilingkuran giapil pagpusil ni Navotas.
Daling gidala ang mga biktima sa tambalanan sa lungsod apan nangamatay sa mga samad pinusilan.
Daling nakaeskapo ang suspek, apan wa nakagawas sa isla, busa nadakpan siya sa alas 12 sa Sabado sa udto sa ila ra sab nga barangay. Duha ka mga kaso’ng murder ipasaka sa kapulisan batok sa suspek sunod semana.