Duha ka tighimo og armas sa dakbayan sa Danao ang gironda sa mga pulis sa managlahing lugar ug petsa apan usa lang ang naposasan samtang ang usa nakasibat.
Ang unang operasyon gihimo niadtong Biyernes, Mayo 16, 2025, sa Purok 5, Barangay Masaba sa maong dakbayan nga miresulta sa pagkasikop sa 46 anyos nga suspek nga usa ka construction worker.
Nakuha sa mga sakop sa Danao City Police Station ang pipila ka wala pa mahuman nga pistola ug pistol barrels, bala, magazines, ug mga gamit sa paghimo niini sama sa lathe machine, grinder, welding machine, ug uban pang metalworking tools.
Ang maong suspek kasamtangan nga gikustodiya sa Danao City Police Station.
Pagka Sabado, Mayo 17, 2025, laing operasyon batok sa usa ka gun manufacturer ang gihimo sa kapulisan sa Danao sa Sitio Patag, Barangay Manlayag.
Apan sa pag-abot sa mga operatiba sa balay niini, nakasibat na ang suspek hinungdan nga ila kining gipaubos sa manhunt operation.
Hinuon, nakuha sa mga pulis ang wala pa mahuman nga .22 caliber paltik revolver, lain-laing bala sa armas ug magazines niini lakip ang mga gamit sa paghimo og armas.
Matod ni Police Captain Dun Blane Tabares, ang information officer sa Cebu Police Provincial Office, nga ang maong operasyon gipahigayon human nakadawat og impormasyon ang kapulisan sa dakbayan sa Danao nga dunay naghimo og mga armas sa duha ka payag-payag sa lugar. Giangkon ni Tabares nga ang paghimo og armas nasunog sa maong mga suspek sa ilang kabanay.
Giandam na sa kapulisan sa Danao ang kasong kalapasan sa Republic Act 10591, ang Comprehensive Firearms and Ammunition Regulation Act, batok sa duha ka mga suspek. / AYB