Duha ka tinun-an sa Grade 11 ang nasakpan sa mga sakop sa Abellana Police Station 2 sa Cebu City Police Office (CCPO) nga naghit-hit og marijuana sa Sitio Amor, Barangay Sambag 1, Siyudad sa Sugbo alas 2:00 sa hapon, Martes, Agusto 5, 2025.
Ang mga gipangdakop mao silang alyas Clare, 18, taga Sitio Paseo, Banawa, Barangay Guadalupe ug alyas Kai, 16, residente sa Sitio Hilca, Barangay Busay, Dakbayan sa Sugbo.
Nakuha gikan kanila ang duha ka linikit nga papel nga dunay sulod sa pinaugang dahon sa marijuana nga dinagkutan na ug usa ka lighter.
Nakadawat og tawag sa 911 hotline ang kapulisan sa Abellana nga dunay nagpadayon nga pot session sa maong dapit.
Dali nga niresponde ang mga personnel sa Station Drug Enforcement Unit sa pagpangulo ni Police Captain Charlie Ancheta ug ilang naabtan ang duha nga nagtabako sa linikit nga marijuana.
Gi turnover na sa Department of Social Welfare ang Development ang 16-anyos aron ipaubos sa debriefing.
Sigon ni alyas Clare nga wala sila masayod nga marijuana diay kadtong ilang gitabako.
Gipasabot niya nga niadto sila sa maong dapit aron manigarilyo sa dili pa mamauli uban sa iyang classmate nga si Kai apan ilang naabtan ang laing mga lalaki nga nanigarilyo sab nga wala sila makaila niini.
Gitunolan sila og tagsa ka stick ug gidagkutan sa ilang dala nga lighter ug ilang gigamit sa pagtuo nga normal ra kini nga sigarilyo.
Giangkon hinuon ni Clare nga nakagamit na siya og marijuana sauna apan wala siya magtuo nga kadtong gihatag sa laing estudyante illegal nga drugas na diay ni.
Nangayo og pasaylo si Clare sa kapulisan dungan sa saad nga dili na mosubli sa paggamit og marijuana ug mopadayon sa pagtungha.
Giandam na ang kasong kalapasan sa Section 11, Article II, Republic Act 9165 ang ipasaka nga kaso sa kapulisan batok sa duha ka tinun-an. / AYB