2 ka tulisan nagpatuo nga mga polis, nakaigo

2 ka tulisan nagpatuo nga mga polis, nakaigo
GITULIS: Si R-Jay Adriatico, 23, ulitawo, driver sa trucking company, miasoy sa Superbalita Cebu sa pagtulis kaniya sa babaye ug lalaki nga nagpatuo nga mga polis. / GUAM P. LOGROÑO

Mga tulisan nga magpailang mga polis nakabiktima dinhi sa dakbayan sa Sugbo.

Usa ka driver sa trucking company nangayo og panabang sa Mambaling Police Station niadtong Martes sa buntag, Hunyo 19, 2024 human siya nabiktima niini.

Si R-Jay Adriatico, 23, ulitawo, driver sa trucking company, taga Cogon Drive, Brgy. Cogon Pardo, dakbayan sa Sugbo, nitug-an sa kapulisan nga gitulis siya sa duha ka mga tawo nga nagsakay sa motorsiklo alas 6:06 sa buntag niadtong Martes sa may Tabada St., Brgy. Basak San Nicolas, dakbayan sa Sugbo.

Matod niya nga sakay siya sa e-bike uban sa iyang higala dihang sila gipara sa duha ka tulisan nga nagmotorsiklo ug ningpaila nga mga polis.

Gikuha ang iyang selpon, ingon man passcode sa Gcash busa nadala ang P16,000.

Sa follow up sa kapulisan, na-withdraw sa mga tulisan ang P16,000 nga balance sa Gcash.

Si Adriatico, nga exclusive nga nahinabi sa Superbalita Cebu, nibutyag nga wala siya magdahom nga tulisan kay nipaila’ng polis ang duha.

Matod niya nga siya maoy nagmaniho sa e-bike uban niya ang higala nga 18 anyos nga naghatud sa suki nga pasahero sa merkado publiko sa Carbon.

Sanglit wala siyay drive sa trucking nag sideline una sa e-bike.

Pag-abot nila sa nahitaboan, sila gipara sa duha ka mga tulisan nga nipailang mga polis ug sila gipangrekisa ug gikuha ang selpon.

Gipugos ang pagpangayo sa pass code sa selpon ingon man pin code sa Gcash.

Nagpasulabi ang ilang kahadlok, nahatag sa biktima ang mga numero.

Gihulagway niini nga naka-helmet sama gigamit sa mga police operative ang mga tulisan.

Gimandoan sila nga magpaspas sa pagpadagan paingon sa police station kay sila magsunod ra sa likod.

Pero wala pa sila makaabot sa police station kalit nga ni-u-turn ang motorsiklo.

“Naluya na gud kog tindak sa e-bike kay na lowbat. Gisinggitan ko paspasi kay adto ta sa police station,” dugang sa biktima.

Sa kasagmuyo niya nga ning-u-turn ang mga tulisan, nilahos siya sa police station.

Wala siya makamay-ong sa mga tulisan gawas lang nga lalaki ug babaye.

Si Major Efren Diaz, Jr., hepe sa Mambaling Police Station nga nahinabi sa Superbalita Cebu, niingon nga napasakaan na nila og kasong pagpanulis ang mga tulisan kay ilang nailhan.

Matod niya nga ang duha kanhi napriso sa mga kaso’ng pagpanulis.

Sa ilang nakuhang impormasyon, duna nay nabiktima sa ubang area ang duha. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph