2 ka tulisan naratol

MISUSI: Ang kapulisan sa lungsod sa Liloan nisusi sa usa ka sanga sa dakong pawnshop chain sa Barangay Poblacion, lungsod sa Liloan nga gisuwayan og tulis sa duha ka mga armadong tawo, alas 3:55 sa haponsa Miyerkules, Enero 10, 2024, apan wala molampos tungod sa pagtingog sa alarm system.
MISUSI: Ang kapulisan sa lungsod sa Liloan nisusi sa usa ka sanga sa dakong pawnshop chain sa Barangay Poblacion, lungsod sa Liloan nga gisuwayan og tulis sa duha ka mga armadong tawo, alas 3:55 sa haponsa Miyerkules, Enero 10, 2024, apan wala molampos tungod sa pagtingog sa alarm system. TAMPO SA LILOAN POLICE

Nangaratol ang duha ka mga tulisan dihang nitingog ang alarm system nga gipindot sa kawani sa usa ka sanga sa dakong pawnshop chain sa Barangay Poblacion, lungsod sa Liloan, alas 3:55 sa hapon sa Miyerkules, Enero 10, 2024.

Si Police Major Eric Gingoyon, hepe sa Liloan Police Station, nipadayag dihang nahinabi sa Superbalita Cebu sa Huwebes, Enero 11, nga ang duha ka mga tulisan pulos mga bagito pa base sa mga lihok niini. Gihulagway ni Gingoyon nga nangaratol kini dihang nakapindot sa alarm system ang usa sa mga teller sa pawnshop.

“Bagito ni sila sa ako lang nakita sa footage sa CCTV. Pagtingog sa alarm, nangaratol. Sa karatol nagpataka’g pamusil,” matod ni Gingoyon.

Ang duha ka mga tulisan kalit nga ning-abot sakay sa usa ka Nmax, nibunot sa ilang armas ug nideklarar og tulis.

Usa ka teller nipindot sa alarm hinungdan nga napakyas ang mga tulisan sa ilang tuyo.

Usa kanila nagpataka og pamusil ug ang bungbong maoy naigo sa bala.

Ang duha ningsibat sa direksiyon paingon sa habagatan gikan sa kinapusoran sa lungsod.

Gisubay na usab nila ang kopya sa CCTV camera sa lugar diin niagi ang mga tulisan sanglit ang nakita nga gitabunan og papel ang plate number sa ilang motorsiklo.

Sa ilang nakita, target sa maong mga tulisan ang mga establisemento nga walay guwardiya.

Gisubay sab nila ang duha ka mga tulisan nga maoy ningtulis sa sanga sa 711 sa Bgry. Alang-alang, dakbayan sa Mandaue niadtong Miyerkules sa kaadlawon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph