2 ka ‘tulisan’ nasikop

NAKUPTAN: Si Jose Abraham Flores, 19, taga Sanciangko St., Barangay Kamagayan, Dakbayan sa Sugbo, nadakpan human niresponde ang mga polis sa pagpangayo og tabang sa usa ka dalaga nga giingong kuhaan unta nila og cell phone alas 10:30 sa Biyernes sa gabii sa Brgy. Apas, dakbayan sa Sugbo. / TAMPO SA MABOLO POLICE
NAKUPTAN: Si Jose Abraham Flores, 19, taga Sanciangko St., Barangay Kamagayan, Dakbayan sa Sugbo, nadakpan human niresponde ang mga polis sa pagpangayo og tabang sa usa ka dalaga nga giingong kuhaan unta nila og cell phone alas 10:30 sa Biyernes sa gabii sa Brgy. Apas, dakbayan sa Sugbo. / TAMPO SA MABOLO POLICE

Duha ka suspetsadong mga tulisan nasikop sa kapulisan sa managlahing mga dapit sa dakbayan sa Sugbo niadtong Biyernes sa gabii, Marso 1, 2024, sa aktong paghimo sa krimen.

Nasikop ang giingong notadong tulisan ug kawatan sa mga sakop sa Mabolo Police Station nga nagdala og armas alas 10:30 sa Biyernes sa gabii, Marso 1, 2024 sa Salinas Drive, duol sa usa ka pawnshop sa Barangay Apas, Dakbayan sa Sugbo.

Ang suspek giila nga si Jose Abraham Flores, 19, taga Sanciangko St., Barangay Kamagayan, dakbayan sa Sugbo.

Nakuha gikan kaniya ang usa ka kalibre .38 nga revolver nga dunay tulo ka mga bala.

Matod ni Police Major Romeo Caacoy Jr., hepe sa Mabolo Police Station, dunay babaye nga nagbarug duol sa usa ka bus stop sa Salinas Drive nga nagpaabot sa pag-agi sa modern jeep nga mobiyahe paingon sa Minglanilla.

Apan ang grupo sa mga lalaki nisuway pagkuot sa bag sa biktima nga naa didto ang cellular phone niini.

Nabantayan sa babaye ang gihimo sa mga batan-on hinungdan nga nangayo siya og pakitabang sa mga polis nag beat patrol sa duol.

Dali nga ningresponde sila si Police Patrolman Vincent Jagunap Montero ug Police Patrolman Ermar Abril Rodriguez.

Ilang nakuptan si Flores samtang ang iyang mga kauban nakadagan.

Dugang ni Caacoy nga ang modus niining maong batan-on nga mga lalaki mao ang pagduol sa ilang biktimahon ug kuhaon ang cellphone dayong sibat.

Nadakpan na kaniadto si Flores sa kasong robbery ug ile­gal nga drugas ug bag-o lang nakagawas sa bilanggoan.

GITULIS

Usa ka inn nga nahimutang sa dalan P. Del Rosario, Barangay Kamagayan, Dakbayan sa Sugbo gitulis alas 7 sa Biyernes sa gabii.

Dali hinuon nga nadakpan ang suspek nga giila nga si Philip John Seva Pantorilla, 37, taga North Poblacion, dakbayan sa Naga.

Positibo siya nga gitudlo sa cashier sa Crystal Inn sa Kamagayan.

Matod sa biktima nga kalit lang nisulod sa inn ang suspek ug nirumbo sa front desk ug dayon og tion sa dala niini nga screw driver ug nideklarar og tulis.

Nakuha sa suspek ang kwarta nga mobalor og P10,100 ug nisibat apan nadakpan dayon sa mga polis nga nag beat patrol sa dapit inabagan sa mga sakop sa Parian Police Station sa pagpangulo sa hepe niini nga si Police Major Henry Orbiso.

Nabawi usab ang kwarta nga iyang gitulis.

Gisuwayan sa Superbalita Cebu ang pagkuha sa habig si Pantorilla apan nagdumili na siya sa pagluwat og pamahayag.

Apan iyang gihimakak nga makadaghan na niya buhata ang pagpanulis sanglit kini pa ang labing unang higayon.

Nahimo matod pa niya ang krimen tungod sa personal nga problema nga wa niya itug-an.

Si Orbiso, hepe sa Parian Police Station, nagkanayon nga mohimo sila’g background investigation kon nabilanggo na ba kaniadto si Pantorilla.

Sa iyang nahibaw-an nagumon sa ilegal nga drugas ang suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph