2 ka welder nakuyapan sa sulod sa septic tank, 1 patay

Septic Tank
Septic Tank

Nakabsan sa kinabuhi ang plumber/welder samtang nagtrabaho sa septic tank sa Dumanjug Public Market uban sa laing kauban sa Martes sa buntag, Hunyo 18, 2024.

Ang Dumanjug Municipal Police Station gipahibawo sa usa ka concerned citizen kalabot sa hitabo.

Dali nga gisusi ang maong dapit ubos sa pagdumala ni P/Capt. Kelvin Roy Mamaradlo.

Ang duha giila nga sila si Mark Gil Alberca Eniego, 28, minyo, taga Barangay Kanguha, Dumanjug ug iyang kauban nga si Jerome Merenillo.

Ang duha adunay gitrabaho sulod sa septic tank sa merkado sa Brgy. Poblacion sa maong lungsod.

Apan kalit lang nga nawad-an sa panimuot sila si Eniego ug Merenillo.

Ang laing duha ka mga trabahante nga sila si Eddie Marie Rellorta Aranda ug Jureme Saberon Amit suway nga ning-rescue, apan wa makalahos sa ilawom tungod sa baho sa septic tank.

Gawas niini, naglisod usab sila sa pagginhawa.

Gigamitan sa mga rescuer og blower isip ventilation dihang gikuha gikan sa ilawom ang mga biktima nga nakuyapan.

Gidala sa Barili District Hospital sila si Eniego ug Merenillo luwan sa ambulansiya.

Apan gideklarar nga patay si Eniego sa pag-abot nga ang hinungdan gumikan sa acute respiratory distress secondary to toxic inhalation injury human gihiling ni Dr. Johanna Louise de Leon. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph