Duha ka mga hubog ang gipangtanggong sa managlahi nga police station human nagmaoy ug niguba sa mga sakyanan nga ilang maagian.
Unang nabalhog sa Mambaling Police Station ang usa ka 32 anyos nga lalaki human nanghagis ug nanglabay og bato sa mga mangagi nga sakyanan sa Natalio Bacalso Ave. duol sa usa ka kan-anan sa Barangay Mambaling, Dakbayan sa Sugbo, ala 1:30 sa kaadlawon, Lunes, Disyembre 9, 2024.
Ang suspek gituohang nagtama sa ilegal nga drugas mao si Rene Rojo, taga Sityo Kinalumsan River, dalan C. Padilla, Barangay Duljo Fatima.
Sa imbestigasyon sa Mambaling Police Station, nasayran nga nagsige og pamato ang suspek sa mga sakyanan nga manglabay sa lugar diin naigo ang taxi unit sa CTC taxi nga gimaneho ni Avelino Anadiano Sacopaso Jr, 39, taga MJ Cuenco avenue.
Pagka alas 9:00 sa buntag sa susamang adlaw, gidakop usab kining 24 anyos nga lalaki nga pwerting huboga human niguba sa side mirror ug pultahan sa usa ka sakyanan sa Sitio Lucimba, Barangay Poblacion Pardo, Dakbayan sa Sugbo.
Ang suspek giila nga si Herbert Bagtasos Silva, 24, kanhi trabahante sa planta sa softdrinks, taga Campo 6, Barangay Manipis, Dakbayan sa Talisay. Ang nireklamo kang Silva mao si Carvy Bandejas Diolin, 42, account manager sa usa ka kompanya ug residente sa Sitio Puso, Barangay Buhisan, Dakbayan sa Sugbo.
Sa imbestigasyon sa Inayawan Police Station nga samtang gi-parking sa biktima ang iyang Toyota Vios sa maong lugar, kalit lang nga giduol sa suspek nga nag-wild na tungod sa kahubog ug gipangbunlot ang duha ka side mirror niini ug ang handle sa pultahan.
Dali nga niresponde ang mga barangay tanod ug gidakop si Silva ug gidala sa Inayawan Police Station.
Dili lang diay usa ka sakyanan ang gipareglahan sa suspek kon dili tulo nga pulos na wad-an og side mirror.
Matod sa suspek nga nitambong siya sa bunyag sa anak sa iyang kauban sa trabaho ug pagkahuman sa bunyag nag-inom sila sa iyang mga kauban ug kompare og bino.
Wala na siya makahinumdom kon unsa na ang sunod nga nahitabo ug sa iyang pagmata naa na siya sa sulod sa selda sa Inayawan police.
"Wala na ko kahinumdom nga mopauli na ko, nalimot na man ko kay pagmatngon nako naa na diay diri sa police station," matod ni Silva.
Igo na lang sa pagpangayo'g pasaylo si Silva sa iyang nahimo ug nisaad nga iyang datadatahan lang pagbayad sa kadaot sa sakyanan. /AYB