Talandugon ang kahimtang sa duha ka managhigala nga nagsakay og motorsiklo dihang nadasmagan sa tourist van, alas 5:25 sa buntag, Dominggo, Agusto.4, 2024, sa national highway sa Brgy. Poblacion, lungsod sa Argao duol sa Caltex Gas Station.
Ang tourist van gimaneho sa usa ka ‘Rodel’, 48, ug taga Casuntingan, siyudad sa Mandaue Sugbo nga may sakay nga mga turistang Japanese national apan way naapektohan kanila.
Ang mga biktima mao sila si ‘Eljohn’, hamtong ang panuigon, ulitawo ug taga Sityo Lolokhan, Brgy. Sua, Argao, kinsa maoy nagmaneho sa motorsiklo ug angkas niya si ‘Charlyn’, 18, dalaga, ug taga Brgy. Canbanua, Argao.
Sa imbestigasyon sa traffic police sa Argao Municipal Police Station ubos sa kamandoan sa ilang hepe nga si P/Maj. Janus Giangan, nasuta sa Superbalita Cebu nga ang managhigala padung sa norte nga direksiyon ug naglikay ang drayber sa motorsiklo sa libaong nga karsada hinungdan nga nikawas kini sa iyang lane ug gikasugat ang tourist van nga padulong sa Tan-awan, lungsod sa Oslob alang sa whale shark watching sa mga Hapon nga turista.
Matod pa, sa kakusog sa impact, ang mga biktima nangalabay ug natugpa sa sementadong dan.
Ang duha gidali sa pagtabang sa rescuers sa Argao ug gidala sa Isidro C. Kintanar Memorial Hospital (ICKMH) sa Brgy. Bogo, Argao.
Samtang ang drayber sa tourist van naa na sa kustodiya sa kapulisan sa Argao ug nagpaabot sa tukmang kaso nga ipasaka batok kaniya. / DVG