Duha ka tawo ang namatay tungod sa dengue sa Mandaue City gikan Enero 1 hangtod Mayo 25, 2025, itandi sa usa ra nga namatay sa susamang panahon sa miaging tuig.
Ang mga biktima mao ang 5 anyos nga bata gikan sa Barangay Centro ug 15 anyos nga tin-edyer gikan sa Barangay Canduman, sumala sa Mandaue City Health Office (MCHO).
Si Dr. Frenzy Antonette Tadle, MCHO medical coordinator for dengue prevention and control, nitaho nga aduna nay 257 ka kaso sa dengue karong tuiga—mas taas itandi sa 231 ka kaso nga natala sa samang panahon niadtong sa 2024.
Ang top 5 ka barangay nga adunay labing daghang kaso sa dengue sa Mandaue City mao ang Canduman - 24 ka; Jagobiao - 20 ; Maguikay -15, ug Tabok ug Banilad nga adunay tag 14 ka kaso.
Gihatagan og gibug-aton ni Tadle nga ang dengue di na seasonal nga hulga.
“Dengue is now a year-round concern, not just during the rainy season. This year was identified as a potential outbreak year; but fortunately, Mandaue currently has the lowest number of dengue cases among highly urbanized cities (HUCs) in Cebu.”
Subay sa Dengue Awareness Month sa Hunyo, ang MCHO nilusad og information caravan sa tanang barangay aron patas-an ang kahibalo sa publiko.
Ang ilang buhatan nagbansay sab sa mga midwife sa barangay aron makatabang sa pag-edukar ug pagpalihok sa mga komunidad sa pakigbatok sa dengue.
Aron mapalig-on ang mga paningkamot sa pagpugong, gipalihok sa MCHO ang mga dengue brigade sa matag barangay nga nagpahigayon og regular nga clean-up drives, household inspections, ug public information campaigns.
Gipatuman sab sa siyudad ang “4S strategy” sa Department of Health aron masumpo ang dengue. / CAV