Duha ka snatcher nga nag motorsiklo ang nadakpan human sila nanglabni og cellphone sa usa ka babaye nga naglakaw duol sa gasoline station sa may dan C. Padilla, Barangay Pahina San Nicolas, Dakbayan sa Sugbo sa alas 10:30 sa buntag sa Lunes, Abril 28, 2025.
Ang angkas nga kawatan nailhan sa alyas nga Ricky, 40, minyo, lumolupyo sa Barangay Duljo-Fatima ning siyudad, samtang ang drayber mao si alyas Manuel, 51, minyo, ug nagpuyo sa susamang barangay.
Si Manuel sa iyang bahin, nihimakak sa pasangil batok kaniya.
Matod niya nga igo ra siya nga gipara ni Ricky ug iya'ng gipasakay sanglit usa man siya ka habal-habal driver apan wala gyud siyay kalibutan nga aduna diay dautan nga plano ang iyang angkas ug una nga nadakpan si Ricky.
Si Manuel niingon nga sa dihang nagunitan ang iyang angkas sa mga tambay, gikulata kini pag-ayo og sa iyang kakuyaw nisuway siya og ikyas apan nasundan siya sa pulis ug nasikop.
Base sa imbestigasyon sa Sawang Calero Police Station, nasayran nga ang 40 anyos nga biktima nga si alyas Vilyn, usa ka empleyado sa bangko, naglakaw padulong sa iyang opisina apan pag-abot sa nahisgutang dapit ang mga suspek nakalit og butho gikan sa iyang luyo.
Si Ricky daling nikanaog sa motor ug gibunlot ang bag sa biktima nga maoy gisudlan sa cellphone nga nagkantidad og P70 mil, ingon man P800 nga kwarta.
Tungod niini, nisinggit og tabang ang biktima hinungdan nga nasikop ang suspek sa mga tambay sa lugar nga giayudahan sa mga traffic personnel sa Cebu City Transportation Office (CCTO) nga sila si Niño Lanojan, Juny Flores, Dante Babatuan ug Pitogo Virgilio.
Si Ritchelle Panyares, usa sa mga saksi, niingon nga iyang gipatiran ang motor sa mga suspek aron dili sila makaikyas.
"Padung to lakaw ang babaye ma'am unya naay ilang gikuha sa pocket, kuwarta guro to or unsay sud ato, cellphone ba. Mao to nabantayan namo ilang gihulbot. Mao to amo na lang gipatiran ang motor. Unya mao to maygani natumba ang motor," matod ni Panyares.
Ang biktima desidido nga mopasaka og kaso’ng pagpangawat batok sa duha ka suspek nga kasamtangan’g gitanggong sa Sawang Calero Police Station. / JDG