Duha nasikop ug gibana-bana nga P2 milyunes nga balor sa gituohang shabu ang nasakmit atol sa buy-bust sa Malubog, bukirang barangay sa dakbayan sa Sugbo sa alas 7:40 sa gabii sa Martes, Pebrero 6, 2024.
Ang suspek giila nga si Ronald Gabunada, 40, way trabaho, ug ang iyang bata-bata nga si Jestoni Rom, 32, estambay, pulos taga Barangay Taptap, siyudad sa Sugbo.
Nihimo sa hiniusang operasyon mao ang Philippine Drug Enforcement Agency (PDEA 7), Naval Forces Central ug Mabolo Police Station human sa positibo nga pag-validate sa nadawat nga taho bahin sa ilegal nga kalihukan sa duha.
Nakuha gikan sa mga suspek mao ang 49 ka mga pakete sa gidudahang shabu nga motimbang og 300 gramos nga dunay estimated market value nga P2,040,000 uban sa buy-bust money, cellphone ug motorsiklo.
Matod ni Leia Alcantara, information officer sa PDEA 7, nga maka-dispose ang mga suspek og tunga sa kilo nga shabu matag semana.
Nadakpan na sa Talamban Police Station si Jestoni Rom niadtong Abril 2020 apan nakapiyansa.
Kasamtangan nga gitanggong sa PDEA 7 custodial facility ang mga suspek ug giandaman na og kaso nga kalapasan sa Republic Act 9165 o Comprehensive Dangerous Drugs Act of 2002.