Giingong notadong drug pusher ug iyang bata-bata nadakpan sa gilusad nga buy-bust sa mga sakop sa Inayawan Police Station alas 3:35 sa Sabado sa buntag, Abril 20, 2024, sa Sityo Villa Zacate, Brgy. Basak Pardo, Dakbayan sa Sugbo.
Ang mga suspek giila nga sila si Juan Renjie Sismar Turado, target sa operation, nabutang sa drug watchlist isip High Value Individual ug si Jeiger Gines Jaca.
Nakuha gikan kanila ang mga pinutos sa gituohang shabu nga motimbang og 25.20 gramos nga dunay standard drug price nga P171,360.00.
Ang Station Drug Enforcement Unit sa Inayawan Police Station nakadawat og impormasyon labot sa ilegal nga negosyo ni Turado ug Jaca busa gipanid-an.
Human nasuta nga namaligya ang mga suspek, gilusad dayon nila ang operation nga niresulta sa pagkasikop sa duha. / AYB