Suspetsadong drug personality nga nagdala og duha ka tuig nga batang lalaki nadakpan sa buy bust sa mga sakop sa Dauis Police Station alas 12:53 sa Huwebes sa udto Marso 21, 2024 sa Purok 1, Barangay Mariveles, lungsod sa Dauis, Bohol.
Ang suspek giila nga si Danilo Opeña, 27, taga Purok 1, Barangay Tabalong, Dauis, kinsa nakuhaan og pakete sa gituohang shabu nga motimbang og 25 gramos nga dunay standard drug price nga P170,000.
Ang duha pa ka tuig nga bata gitugyan sa kapulisan sa Dauis sa Provincial Social Welfare and Development sa Bohol aron mapaubos sa intervention.
Gihimo dayon ang pagpalawom sa imbestigasyon kon kinsa ang ni-supply kaniya sa ilegal nga drugas.
Human nahatag ang tanang kasayuran, gilusad dayon ang follow-up operation lima ka oras ang nakalabay nga niresulta sa pagkasikop sa usa ka 40 anyos nga babaye sa Purok 2, Mariveles.
Giila ang suspek nga si Teresita Bullen, alyas Che Che, 40, taga Barangay Mayacabac, Dauis.
Nasakmit gikan kaniya ang 205 gramos sa gituohang shabu nga dunay SDP nga P1,394,000.
Tungod sa maong kalampusan, gidayeg ni Police Brigadier General Anthony Aberin, hepe sa Police Regional Office 7, ang kapulisan sa lungsod sa Dauis nga bisan sa subsob nga pagpangandam sa siguridad sa Semana Santa, wala sila nilugak sa kampanya batok kriminalidad. (AYB)