DUHA ka suspek nga drug pushers ang gidakop sa managlahing buy-bust sa Siyudad sa Sugbo ug sa Lungsod sa Panglao, Bohol sa Biyernes sa kadlawon, Abril 11, 2025.
Una nga nasikop atol sa mga sakop sa Drug Enforcement Unit sa Parian Police Station 1 nga gipangulohan sa ilang hepe nga si Police Major Marvin Fegarido sa ala 1:10 sa kaadlawon, Biyernes, Abril 11, 2025 sa Sitio BSJCO, Barangay T. Padilla, Siyudad sa Sugbo, si Andrew Ortega Baflor, 42 anyos nga taga Barangay Fortaliza, Lungsod sa Tuburan, Sugbo.
Nakuha gikan sa suspek ang mga pinutos sa gituohang shabu nga motimbang sa 215 gramos nga balor og P1,462,000.
Matod ni Fegarido nga dugay na nila nga gipanid-an si Baflor apan kon ilang suwayan sa pagdakop mokalit lang kini og kawagtang ug masayran na lang nila nga nitago na siya sa laing lugar.
Makig-alayon ang Parian Police Station sa Tuburan Police Station aron sutaon kon duna bay laing kaso nga giatubang ang maong suspek.
Ang ikaduhang nasikop sa mga sakop sa Provincial Intelligence Unit (PIU) sa Bohol Police Provincial Office sa alas 2:08 sa kaadlawon sa Biyernes, Abril 11, 2025, sa Purok 6, Barangay Libaong sa Lungsod sa Panglao mao si Jonathan Gerigdig, 41 anyos nga taga Lambo Street, Barangay Guiwanon, Lungsod sa Baclayon, Bohol.
Nakuha sa mga operatiba ang mga dagkong putos sa gituohang shabu nga motimbang sa 110 gramos nga dunay standard drug price nga P748,000 ug usa ka kalibre 22 nga pistola nga dunay tulo ka bala.
Usa sa mga sakop sa PIU nibutyag nga human nigawas ang pangalan ni Gerigdig nga namaligya og ilegal nga drugas gipaubos dayon nila kini sa usa ka bulan nga case buildup.
Nakig-transact sila sa suspek nga mopalit og ilegal nga drugas ug sa dihang nisanong kini ila dayon’g gilusad ang buy-bust.
Kasong kalapasan sa Section 5 ug 11, Section II, Republic Act 9165 o Comprehensive Dangerous Drugs Act of 2002 ang atubangon sa duha ka suspek.
Gawas sa ilegal nga drugas, mag-atubang usab si Gerigdig og kasong kalapasan sa Republic Act 10591 kun Illegal Possession of Firearms ug Comelec gun ban. / AYB