Punoan sa bule nga putlunon na unta maoy nakaingon sa kamatayon sa duha ka mga bata nga lalaki nga mga estudyante niadtong Huwebes sa alas 2 sa hapon, Enero 25, 2024 sa sityo Luy-a, Brgy. Lamac, lungsod sa Pinamungajan, Sugbo.
Usa usab ka tinun-an ang naangol atol sa insidente.
Ang mga biktima nga nangamatay human nadat-ugan sa natumba nga bule giila nga sila si John Mark Cuyos Abarquez, 15, tinun-an sa Grade 10; ug John Kyle Cabaw-Cabaw Cabilino, 12, naa sa Grade 7. Ang duha pulos mga tinun-an sa Lamac National High School sa lungsod.
Naangol usab ang ilang kauban nga si Sandra Labrador Cabilino, 13, tinun-an sa Grade 8 sa samang tunghaan.
Sa phone interview sa Superbalita Cebu niadtong Huwebes kang Police Staff Sgt. Vincent Alquiza, police investigator on case sa Pinamungajan Police Station, siya niingon nga base sa asoy ni Sandra kanila, nagkuyog sila sa iyang mga ig-agaw nga sila si Reniel, 14, Junior, 13, Walter, ug John Kyle. Ilang giadto ang umahan nila ni Walter kay nanghawan sa mga sagbot.
Sa ilang pagpanguli, tungod sa kakapoy ug kainit sa panahon, ningpahuway sila sa daplin sa karsada kay landong.
Sa ilang pag-abot sa dapit, diha na si Abarquez naglingkod sa iyang gimaneho nga motorsiklo sa tungod sa bule. Di siya kuyog sa grupo.
Sa kalit lang nabali ang katunga sa punoan sa bule, apan sila si Sandra ug ang iyang mga ig-agaw, nakamatikod ug nakadagan. Apan sila si Abarquez ug si John Kyle nadat-ugan sa punoan hinungdan nga nangamatay diha-diha.
Naigo usab si Sandra apan di grabe ang iyang samad.
Matod ni Alquiza nga ang barangay duna na untay budget nga gigahin aron sa pagputol sa bule nga gihulagway nga guwang na kaayo ug nagkagabok.
Apan way nakapasalig sa pagputol niini.