Duha ka mga lalaki nga nalambigit sa ilegal nga sugal nadakpan sa managlahi nga operations sa kapulisan sa probinsya sa Sugbo ug Police Regional Office 7 (PRO 7) sa Martes, Abril 16, 2024.
Unang nadakpan giila nga si Lito Villamor Ylanan, 47, taga Purok Diego Silang, Brgy. Cayang, dakbayan sa Bogo, amihanang Sugbo.
Nasakmit gikan kaniya ang mga gamit sa ilegal nga swertes human naatlan nga nagpapatad sama sa bundle sa stub nga dunay nagkalainlaing numbers combination ug kwarta nga halin sa iyang pagpataya.
Samtang nadakpan usab sa Regional Intelligence Unit sa Police Regional Office 7 si Odelon Caña, alyas Odelon, sa Sityo Molave, Barangay Tabunok, Siyudad sa Talisay.
Nakuha gikan kaniya ang usa ka ballpen, bundle tally sheet nga dunay nagkalainlaing numbers combination, duha ka pahina sa tally sheet ug P2,000.
Nakapiyansa na hinuon si Ylanan samtang naa pa sa PRO 7 si Caña human napasaka ang tukmang kaso batok kanila. / AYB