2 patay, 2 angol sa aksidente sa motor

    PATAY SA BANGGA: Patay nang niabot sa tambalanan ang drayber sa motorsiklo human siya nabangga ug naligsan niining dumptruck nga iyang gikasugat sa Biyernes sa hapon, Pebrero 23, sa Brgy. Canduling, Ronda./ TAMPO SA RONDA POLICE
PATAY SA BANGGA: Patay nang niabot sa tambalanan ang drayber sa motorsiklo human siya nabangga ug naligsan niining dumptruck nga iyang gikasugat sa Biyernes sa hapon, Pebrero 23, sa Brgy. Canduling, Ronda./ TAMPO SA RONDA POLICE

Duha ka mga drayber sa motorsiklo ang nangamatay ug laing duha ang nangaangol sa tulo ka managlahing mga aksidente sa motorsiklo sa managlahi nga mga dapit sa Sugbo.

Sa Sabado sa alas 8 sa buntag, Pebrero 24, 2024, namatay ang usa ka 64 anyos nga mag-uuma dihang nakaligis og iro samtang nagnagmotorsiklo padung nga magpagaling og mais.

Ang aksidente nahitabo sa national highway sa Sityo Labangom, Brgy. Tulic, Argao, habagatang Sugbo.

Ang biktima giila nga si Jerrysito Diguete, minyo, taga Sityo Banahaw , Brgy. Talaga, Argao.

Sa pakighinabi sa Superbalita kang Talaga, Argao brgy. konsehal Roldan Camson, siya niingon nga si Diguete gikan sa ilaha sa Banahaw, Talaga nga may karga nga duha ka sako’ng mais aron ipagaling sa galingan sa Suba, Poblacion.

Apan pag-abot sa mao nga dapit, may iro nga kalit nga nilabang ug naligsan sa biktima nga niresulta sa pagkalamba sa motorsiklo.

Sanglit wala nag-helmet, nakaangkon og grabing kadaut sa iyang ulo ang biktima, kinsa gidali sa pagdala sa Bogo Argao District Hospital apan mga alas 10 sa buntag, si Diguete namatay.

NADASMAG

Dead on arrival usab sa tambalanan ang usa ka lalaking nagmotorsiklo nga nadasmag ug napasok sa iyang gikasugat nga dump truck alas 5:32 sa hapon sa Biyernes, Pebrero 23, 2024 , sa karsada sa Brgy. Canduling, Ronda, Sugbo.

Ang biktima nga drayber sa motorsiklo giila nga si Dave Tecson, 23 , taga Valencia City, Bukidnon samtang ang dump truck driver giila nga si Herbert Caballero, 35, minyo, taga Siyudad sa Talisay.

Base sa imbestigasyon ni Police Master Sgt. Arnold Ator, traffic police investigator sa Ronda Police Station ubos sa kamanduan sa ilang hepe nga si Police Lt. Jec Seares, si Tecson gikan sa Siyudad sa Sugbo padulong sa kinapusoran sa Ronda samtang si Caballero gikan sa Alegria padulong sa Siyudad sa Toledo.

Giingong sa pag-abot ni Tecson sa kurbadaho’ng bahin sa karsada, nikawat kini sa lane sa dump truck hinungdan nga siya nadasmag.

Siya napasok sa atubangan sa trak ug naligsan sa panguwahiang ligid niini samtang ang motorsiklo nabangil.

Ang biktima nga nakabaton og grabing kadaut sa kalawasan gidala sa Badian District Hospital apan gideklarar nga patay nang niabot.

Samtang ang drayber sa dump truck naa na sa kustodiya sa kapulisan sa Ronda.

HIT AND RUN

Samtang barangay tanod ug iyang angkas nangaangol sa usa ka kaso sa hit and run sa alas 3 sa hapon sa Sabado, Pebrero 24 sa eskina Prenza, Brgy. Talaga, Argao.

Sa interbyo sa Superbalita Cebu kang brgy. konsehal Camson nga nitawag ning mantalaan, siya niingon nga ilang brgy. tanod ug angkas niini sa motorsiklo nangaangol.

Ang mga biktima nga nangalandig sa Bogo Argao District Hospital mao sila si Valentin Milgar, 49, minyo, tanod,taga Sityo Malalag samtang ang angkas giila nga si Columbo Tagones, 63, taga Dobdon.

Matod pa ni Camson nga ang mga biktima ningtadlas sa maong dapit dihang sa kalit lang usa ka kolor grey nga sakyanan nga may plate number nga 9214 nidumbol kanila hinungdan sa pagkatumba sa motorsiklo.

Si Camson niingon nga bisan kon gipara ug may nigukod sa wa mailhing drayber, wa gyud nihunong sa pagpadagan padulong sa kinapusoran sa lungsod.

Samtang ang kapulisan sa Argao ubos sa kamanduan sa ilang hepe nga si Police Maj. Ivy Martin Bartolome niingon nga ilang subayon sa Land Transporation Office (LTO) kon kinsay tag- iya ug drayber sa maong sakyanan aron manubag sa salaod nga iyang nabuhat.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph