Duha ka mga tawo, lakip ang usa ka singko anyos nga batang babaye, ang nangamatay human nibangga ang usa ka sports utility vehicle (SUV) sa passenger entrance sa departure area sa Ninoy Aquino International Airport (NAIA) Terminal 1 niadtong Dominggo, Mayo 4, 2025.
Sa usa ka interbyu sa mga tigbalita, niingon si Transportation Secretary Vince Dizon nga anak sa usa ka overseas Filipino worker (OFW), kinsa manuglarga sa gawas sa nasod, ang singko anyos nga biktima.
“Masakit, kausap ko yung father kanina, OFW siya. Hinatid lang s’ya ng pamilya niya kasama ‘yung anak niya tapos ito yung nangyari,” matod ni Dizon.
Nidugang si Dizon nga adunay laing tulo ka mga tawo ang nangaangol sa insidente ug kasamtangang gitambalan sa ospital.
Gipahibalo usab ni Dizon nga ang CEO sa San Miguel Corporation (SMC) nga si Ramon Ang nisaad nga iyang abagahon ang tanang gastuhan sa tambal ug lubong sa mga biktima.
Ang SMC maoy nangulo sa grupo sa mga kompanya nga nagdumala sa rehabilitasyon sa mga terminal sa NAIA.
Ang drayber sa SUV anaa na sa kustodiya sa kapulisan.
“Yung driver ay may hinatid siyang pasahero. May isang pasahero siyang hinatid at pagkababa nung pasahero, tinulungan niya ibaba ‘yung bag nung pasahero. Pumunta na ‘yung pasahero papasok ng NAIA at doon biglang nakita namin ‘yung sasakyan na rumagasa. So right now, initially mukha naman hindi pumunta dito yung driver para managasa, hindi intentional,” pasabot ni Dizon.
Sa taho sa Philippine National Police Aviation Security Group, giingon nga ang laing namatay mao ang usa ka 28-anyos nga lalaki samtang ang nangaanol naglakip sa usa ka kuwatro anyos nga batang babaye. / TPM / SunStar Philippines