Duha ang nangamatay ug lima ang nangaangol sa duha ka managlahing mga aksidente sa kadalanan sa Lalawigan sa Sugbo sa Huwebes, Abril 4, 2024.
Sa Sitio Gaway-gaway, Barangay Uling, siyudad sa Naga, alas 3:45 sa kaadlawon, usa ka babaye nga pasahero namatay samtang laing tulo nangaangol human nabangga ang usa ka bus sa Gabe Transport sa punoan sa kahoy.
Sa imbestigasyon sa kapulisan sa dakbayan sa Naga ubos sa kamanduan sa ilang hepe nga si P/Lt. Col William Humoc, ang nakalas nga pasahero giila nga si Andrea Mananay, hamtong, taga Barangay Magdugo, siyudad sa Toledo.
Ang ang mga nangaangol giilang sila si Eric Pondoy, 36, taga lungsod sa Balamban; Laren Rebicoy, 30, taga Brgy. Lutopan, Toledo; ug Violeta Garcia, 54, taga Brgy. Lutopan, Toledo.
Ang mga biktima gipangdala sa Vicente Mendiola Center for Health Infirmary sa Naga apan si Mananay gideklarar nga dead on arrival (DOA).
Sa pagkighinabi sa Superbalita Cebu sa drayber nga si Derold Tajones Geraldez, 37, ulitawo apan dunay kapuyo, taga Brgy. Lutopan, Toledo, niingon nga wala mogana ang brake sa bus sa dulhugon nga dan sa Gaway-gaway, Uling.
Mao kini hinungdan nga iyang giwaling ang manubela padulong sa daplin sa karsada, diin unang naigo ang usa ka koral ug dayon ni lahos ngadto sa punoan sa Mahogany.
Matod ni Geraldez, pagkadusmo na niya sa koral, may namatikdan siya nga usa ka pasaherong babaye nga nilayat agi sa bintana ug naigo sa punoan sa kahoy.
Si Geraldez naa na sa kustodiya sa kapulisan sa Naga ug nagpaabot nga pasakaan og kasong reckless imprudence resulting to homicide ug multiple physical injuries and damage to property.
Samtang, patay ang usa ka drayber sa taxi nga nanglimpiyo sa iyang sakyanan daplin sa national highway sa Brgy. Lugo, lungsod sa Borbon, amihanang Sugbo dihang nadasmagan sa usa ka Fuzo Canter van, alas 7:30 sa buntag.
Ang biktima giila nga si Junnel Arcilla Cahayagan, 41, drayber sa Toyota Hi-Ace taxi, taga Barangay Lugo, Borbon,
Samtang ang drayber sa Fuzo Canter giila nga si Mark Edward Maspara Abano, 36 , minyo, taga Brgy. Tabunok, siyudad sa Talisay.
Sa follow up sa Superbalita Cebu ngadto sa Borbon Municipal Police Station nasayran nga ang biktima diha sa daplin sa highway nanglimpyo sa iyang gimaniho nga Hi-Ace van taxi.
Kalit lang nadasmagan kini sa Fuzo Canter van ug sa kakusog sa impact, nalagpot ang biktima uban sa iyang sakyanan ngadto sa bakanting luna sa katubhan.
Dihang nadawat sa kapulisan ang alarma sa aksidente, dali kining girespondihan nga gipangulohan sa ilang hepe nga si P/Capt. Gerry M Antopina.
Si Cahayagan gidali sa pagdala sa Juan Dosado District Hospital apan gideklarar sa attending physician nga dead on arrival (DOA).
Samtang ang drayber sa Fuzo Canter naa na sa kustodiya sa kapulisan sa Borbon.
Si Abano nga nahinabi sa Superbalita Cebu niingon nga gikan siya sa siyudad sa Sugbo ug padulong sa lungsod sa Daanbantayan aron pag-deliver og mga asin, monggos ug mga plastik sa mga tindahan.
Apan, dason niya, sa iyang pag-abot sa Lugo,manobela sa iyang gimaniho nga Fuzo Canter kalit niungot nga di na niya malubag hinungdan nga nadasmagan ang biktima bisan tuil-id ang dalan.
Matod niya nga ang iyang bag ong truck boy angol usab nga nadala sa ospital.
Siya nakaangkon og gamay lang nga mga samad.
Si Abano posible nga mapasakaan og kasong reckless imprudence resulting to homicide and damage to property sa pamilya sa biktima.