Patay diha-diha ang drayber sa motorsiklo ug ang iyang babaye nga angkas sa disgrasya sa viaduct sa South Road Properties (SRP) sa Brgy. Ermita, siyudad sa Sugbo, alas 11 sa buntag sa Miyerkules, Abril 10, 2024.
Nakabsan sa kinabuhi giila nga sila si Brian James Liva Pedrosa Bayarcal, 26, ulitawo, drayber sa motorcycle ride-hailing app nga Move It, taga Barangay Lamintak, lungsod sa Medellin.
Lakip sa nakalas mao ang iyang angkas nga si Chlea Jane Coronel Gomez, 28, dunay address nga Oakridge, dakbayan sa Mandaue.
Sa imbestigasyon ni P/SSgt. Kitz Daryl Palaña, traffic police investigator sa Traffic Enforcement Unit sa Cebu City Police Office (CCPO), sila si Bayarcal nasangit sa konkreto nga road separator.
Matod pa, tungod sa kakusog sa ilang pagkadasmag, natumba ngadto sa pikas lane si Bayarcal ug naigo sa gikasugat nga Mitsubishi Expander Cross nga gimaniho ni Dominador Ampoloquio Duyongan, 60, taga dan Sabellano, Upper Surban, Barangay Pardo, siyudad sa Sugbo.
Gumikan sa grabing kadaut sa kalawasan sa mga biktima, ang duha gideklarar nga patay na sa ningrespondi nga mga sakop sa Cebu City Disaster Risk Reduction and Management Office (DRRMO).
Samtang ang drayber sa SUV nga si Duyongan naa na sa kustodiya sa Cebu City Traffic Police alang sa dugang imbestigasyon sa maong aksidente ug nagpaabot kon pasakaan og kaso.
Si Police Major Jonathan dela Cerna, hepe Traffic Police Unit sa CCPO, nagkanayon nga nagbiyahe ang motorsiklo paingon sa south dihang nahitabo ang aksidente sa viaduct duol sa Ludo and Luym, unahan sa tunnel.
Dihang natumba kay nadasmagan ang road separator, ang drayber sa Move It nga si Bayarcal nalabay sa pikas lane ug nabanggan sa gikasugat nga Mitsubishi Xpander.
“Nabangga ni sa center island (road separator) ang gamotor, nya nalupad. Ang kining drayber naigo sa SUV. Mao ni ang initial investigation sa akoang traffic personnel,” matod ni dela Cerna sa mga tigbalita.
Awhag ni Dela Cerna ang mga motorista nga moagi sa SRP nga mag-amping sa pagpadagan ug labing maayo nga magpahinay lang sa ilang dagan aron malikay sa disgrasya.
Matag adlaw na lang dunay maalarma nga disgrasya sa SRP nga naglambigit sa mga motorsiklo ug dagko nga mga sakyanan, dason sa hepe. / DVG / AYB