Duha ang namatay sa buwag nga disgrasya sa motorsiklo sa Dakbayan sa Naga ug Lungsod sa Balamban.
Unang insidente namatay ang usa ka ball boy sa duwang tennis ug naangol iyang angkas human ilang motorsiklo nibangga sa trailer truck alas 11:20 sa gabii Lunes Mayo 5, 2025, sa National Highway Barangay Colon, Dakbayan sa Naga.
Ang namatay mao si Joemike Ombao, 34, taga Barangay Cantao-an, Naga nga dead on arrival (DOA) sa tambalanan samtang angol si Carl Paderna, ball boy gihapon.
Gitanggong si Nacianseno Ricardel, 48, taga Barangay Minolow , Lungsod sa Barili, driver sa Sino Truck nga adunay trailer.
Si Police Staff Sgt. Jeff Bartiana, imbestigador sa traffic sa Naga Police Station nga nahinabi sa Sunstar Superbalita Cebu niingon nga naka-parking ang Sino Truck daplin sa karsada padulong mag-deliver sa mga karga nga feeds.
Ang mga biktima gikan sa Poblacion padulong mopauli sa Cantao-an nga puwerte kangitngit sa dalan ug wala makabantay sa nag-parking nga truck.
Samtang namatay sab ang usa ka ulitawo human nabangga sa punoan sa mangga iyang motorsiklo alas 3:50 sa kaadlawon, Martes May 6,2025, sa Barangay Prenza, Lungsod sa Balamban. Ang biktima giila nga si Jolan Dabon Alper, 23, taga Barangay Cogon, Lungsod sa Tuburan nga DOA sa tambalanan sa Balamban.
Padulong mopauli ang biktima sakay sa iyang Honda motorsiklo ug pag-abot sa kurbada sa maong lugar, wala na makabawi sa manubela ug nabangga. / GPL