2 patay sa mga aksidente sa kadalanan sa Sugbo

2 patay sa mga aksidente sa kadalanan sa Sugbo
NABANGGA: Ang ten-wheeler Isuzu truck nga gikargahan og mga sinakong semento niharos sa usa ka tricycle nga dunay mga pasahero, ubang mga sakyanan ug nidasmag pa sa usa ka pedestrian dayon nidasmag sa Land Bank-Barili branch sa national highway sa lungsod sa Barili, habagatang kasadpang Sugbo sa alas 2:30 sa hapon sa Hunyo 22, 2024. TAMPO SA BARILI POLICE

Duha ang nangamatay ug walo ang nangasamdan sa managlahi nga mga aksidente sa mga sakyanan sa kadalanan sa Sugbo sa Biyernes ug Sabado.

Patay nang nidangat sa tambalanan ang usa ka nagmaniho sa motorsiklo nga nadasmagan sa usa ka awto alas 10:20 sa Biyernes sa gabii, Hunyo 21, 2024 sa national road sa Brgy. Yati, Liloan, amihanang Sugbo.

Ang biktima giila nga si Gernald Escultor Pagodon, 48, minyo, taga Mother Ignacia Village, Brgy. Pulpogan, Consolacion, amihanang Sugbo.

Ang nakadasmag nga Toyota Rush gimaneho ni Marjo Vincent Dumaguit Dadula,31, minyo, taga Dunggoan, Perrelos, Siyudad sa Carcar, habagatang Sugbo.

Sa imbestigasyon sa kapulisan sa Liloan ubos sa kamanduan sa ilang hepe nga si P/Maj. Eric Gingoyon, nasuta nga si Pagodon nagbiyahe gikan sa habagatan padulong sa norte dihang ni-counterflow sa lane nga gisubayan sa gikasugat nga sports utility vehicle (SUV).

Si Pagodon gidali sa pagdala sa Cebu Provincial Hospital-Danao City apan patay nang niabot.

HIT AND RUN

Nakabsan usab sa kinabuhi ang usa ka wa mailhing lalaki nga biktima sa hit and run sa national highway sa Brgy. Simala, Sibonga alas 5:40 sa buntag sa Biyernes, Hunyo 21.

Nasuta sa Superbalita Cebu gikan sa kapulisan sa Sibonga nga sila nakadawat og tawag sa usa ka concerned citizen mahitungod sa aksidente.

Ila kining girespundihan ni P/Staff Sgt. Bricel Ricaborda ug ni Staff Sgt. Apolinar Albiso Jr. ug mga sakop sa Sibonga Municipal Disaster Risk Reduction and Management Office.

Ilang naabtan ang biktima nga nagligdas sa daplin sa karsada nga nakaangkon og grabing kadaut sa iyang kalawasan.

Gituohan nga may deperensya sa iyang pangisip ang biktima nga naglaroylaroy sa maong dapit.

Gidali sa pagdala sa ngadto sa Cebu Provincial Hospital-Carcar City apan pipila ka mga oras ang nakalabay namatay.

Sila si Ricaborda ubos sa kamanduan sa ilang hepe nga si P/Capy. Fort Antony Valdez nangsusi na sa mga CCTV sa dapit aron makatabang sa pag-ila sa sakyanan nga nakadasmag.

Ang mga staff sa tambalanan nanawagan sa mga tagtungod sa wa mailhing lalaki.

BARILI

Usa ka ten-wheeler Isuzu truck nga gikargahan og mga sinakong semento nawad-an og brake ug niharos sa mga sakyanan ug nakaigo og usa ka pedestrian una pa nadasmag sa Land Bank-Barili branch sa alas 2:30 sa hapon sa Sabado, Hunyo 22, 2024 sa Lungsod sa Barili.

Walo ka mga tawo ang na­ngaangol.

Ang truck gimaniho ni Jomarie Tolentino Delmonte, hamtong, minyo, taga Siyudad sa Victorias, lalawigan sa Negros Oriental, usa sa mga nangaangol.

Ang iyang mga naigo mao ang usa ka tricycle nga gimaniho ni Edison Omblero Caballero, 49, minyo, taga Brgy. Mantalongon, Barili.

Ang mga pasahero sa tricycle nga nangaangol giila nga sila si Cherielyn Rio Bayawa, 17, taga Brgy Sta. Ana, Barili; Samantha Cañete Dandan, 17, taga Brgy. Candugay; Angela Dandan Ricafort, 17, taga Brgy. Candugay; Chequi Undang Rosalio, 18, taga Brgy Hilasgasan; ug Shiny Lou Alquizalas, 17, taga Brgy. Japitan.

Naangol usab ang pedestrian nga si Victoria Evangeline Arnibal Eredera, 66 minyo, taga Brgy Sta. Ana.

Lakip sa naigo mao ang usa ka Mazda Bongo ug Toyota Hilux.

Sa imbestigasyon sa kapulisan sa Barili ubos sa kamanduan sa ilang hepe nga si P/Capt. John Elcid P. Layug, nasayran sa Superbalita Cebu nga padulong sa Brgy. Tangil, Dumanjug, ang truck.

Apan pag-abot sa Brgy Sta. Ana, matod sa drayber nga nawad-an og brake ang iyang sakyanan mao nga wa na niya ma-control.

Pag-abot sa Brgy. Poblacion iya na lang gibangga ang truck sa Land Bank building kay way tawo kay Sabado aron di na siya makaigo og laing mga sakyanan ug pedestrian.

Si Delmonte gi-rescue sa iyang pagkapiit ug ang bombero niresponde usab kay nasunog ang ligid sa truck.

Ang mga angol dali nga gipangdala sa tambalanan. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph