2 patay sa pagkabalitok sa van for hire sa CCLEX

LIGID MIBUTO: Nabalitok ang van-for-hire nga nanukad sa terminal sa  Babag, Lapu-Lapu City nga mobiyahe paingon sa dakong tindahan sa South Road Properties sa Cebu City human mibuto ang usa sa mga ligid niini sa dihang nagtungas sa CCLEX, habig sa Lungsod sa Cordova. Ubang mga pasahero misudlot gikan sa windshield sa van ug gikatahong duha ka babaye’ng pasahero ang nangamatay. HULAGWAY GIKAN SA CORDOVA MUNICIPAL POLICE STATION
LIGID MIBUTO: Nabalitok ang van-for-hire nga nanukad sa terminal sa Babag, Lapu-Lapu City nga mobiyahe paingon sa dakong tindahan sa South Road Properties sa Cebu City human mibuto ang usa sa mga ligid niini sa dihang nagtungas sa CCLEX, habig sa Lungsod sa Cordova. Ubang mga pasahero misudlot gikan sa windshield sa van ug gikatahong duha ka babaye’ng pasahero ang nangamatay. HULAGWAY GIKAN SA CORDOVA MUNICIPAL POLICE STATION

Gipahibawo sa hepe sa Lapu-Lapu City Disaster Risk Reduction Management Office (CDRRMO) Nagiel Banacia nga base sa taho nga nadawat sa City’s NERVE Command Center nga duha ka mga babaye’ng sakay sa van-for-hire nakabsan sa kinabuhi.

Matod sa report sa Cordova Municipal Police Station nga moabot sa 20 ka mga pasahero, lakip na ang drayber, ang sakay sa V-hire nga nanukad gikan sa terminal sa Barangay Babag, Lapu-Lapu City paingon sa dakong mall sa South Road Properties, Cebu City, dihang nadisgrasya sa pagtu­ngas sa viaduct sa Cebu–Cordova Link Expressway habig sa Lungsod sa Cordova.

Ang maong aksidente nahi­tabo sa alas 2:30 sa hapon sa Sabado, Mayo 4, 2024.

Sumala pa ni PSSGT. Riche Abao, Traffic police investigator sa Cordova Police Stn., nga ang Nissan Urvan (V-hire) nga gimaneho ni Christopher Dejeto Tuñacao, taga Brgy. Tawason, Mandaue City, puno sa mga pasahero atol sa aksidente.

LIGID MIBUTO

Apan sa ilang pagbiyahe mibuto ang usa sa mga ligid sa sakyanan hinungdan nga mibalitok.

Usa ka motorista ang nakakuha og video gikan sa iyang dash cam makita ang pagbuto sa ligid ug niaso ang kalsada sa dihang mibalitok ang van dihang wa na makontrolar sa drayber ang manubela.

Ning pagsuwat, wa pa natino kon diin nga ligid ang ni­buto, atubangan o likod.

Si Bañacia nga usa sa mga responder sa hitabo nagkanayon nga base sa inisyal nga assessment pito ka tawo ang gihulagway nga ‘red patient’ kun grabe ang kondisyon.

Samtang ang duha ka mga babayeng pasahero nga gikatahong namatay nadangat ngadto sa Mactan Doctor’s Hospital ug Cebu City Medical Center.

Atol niining pagsuwat, padayon pa nga gikuha ang mga ngalan sa mga pasahero sa ma­ong V-hire nga gidala sa Lapu-Lapu City Hospital, ACE Medical Center-Cebu City ug CCMC. / Dugang taho ni Guam P. Logroño

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph