2 samdan sa mga pagpamusil

2 samdan sa mga pagpamusil
SunStar Local News

Nangalandig sa tambalanan ang duha ka mga lalaki nga gipamusil sa managlahi nga mga dapit sa lalawigan sa Sugbo niadtong Huwebes sa gabii, Hulyo 4, 2024.

Usa sa mga biktima naglingkod daplin sa sapa sa dihang gipusil alas 8 sa gabii sa Sityo Buswang, Brgy. Cambang-ug, Siyudad sa Toledo.

Ang biktima nga si alyas Roy, 48, minyo, nagpuyo sa dapit samtang ang mga suspek iya ra sang mga silingan nga sila si alyas Johnny, 30, minyo, ug Jaybe.

Ang kapulisan sa Siyudad sa Toledo nga gipangulohan ni P/ Lt. Colonel Manolo Salvatiera nga nakadawat sa alarma dali’ng ningresponde apan sa ilang pag-abot sa lugar, ang biktima gidala na sa ospital.

Sa pasiunang imbestigasyon, nasayran sa Superbalita Cebu nga ang biktima nagpahangin samtang naglingkod daplin sa sapa dihang ang mga suspek nga giingong pulos hubog nangabot.

Si Johny giingong nisulti sa biktima nga arogante kini ug dayon gipusil si Roy, kinsa naigo sa tuong tiil.

Ang biktima gidala sa tambalanan samtang ang mga suspek ningsibat apan sa pagsuwat ning taho wa pa madakpi.

Mag-atubang sila og mga kaso nga frustrated murder.

CARCAR

Naukay ang mga residente sa Purok 3 Proper, Brgy. Ocaña, sa Siyudad Carcar human sila nakadungog sa mga buto sa pusil mga alas 7:30 sa gabii.

Ang biktima giilang si alyas Jonel, 32, ulitawo, lumad nga taga Sityo Libo, Brgy. Sayaw, Sibonga, habagatang Sugbo apan nagpuyo na sa dapit.

Ang gunman gihulagway nga usa lang ka wa mailhing lalaki nga nagmotorsiklo ug nag jacket og itom.

Sa pasiunang imbestigasyon sa kapulisan sa siyudad ubos sa kamanduan sa ilang hepe nga si P/Lt. Col. Bryan O’Niel Salvacion, ang biktima naglingkod sa lantay kuyog sa iyang mga higala nag-estorya.

Apan sa kalit lang, nibutho ang nag-inusarang gunman nga nagmotorsiklo ug gipusil sa makaupat ka mga higayon ang biktima, kinsa naigo sa nagkadaiyang bahin sa lawas.

Ang gunman daling nisibat padu’ng sa Sityo Proper, Brgy. Napo samtang ang biktima gidala sa Cebu Provincial Hospital sa Dakbayan sa Carcar, diin siya kasamtangan nga giatiman.

Way napagan sa pagpamusil ug na-recover sa dapit ang upat ka kabhang sa mga bala sa kalibre .45 nga pistola. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph