Usa ka street level individual nga 58 anyos nga lalaki ug usa ka mahuyang ang nadakpan sa kapulisan sa managlahing lugar sa Siyudad sa Sugbo.
Ang unang nasikop sa mga sakop sa Drug Enforcement Unit sa Carbon Police Station pasado alas 11 sa gabii sa Huwebes, Mayo 22, 2025 sa may Sitio Bato, Barangay Ermita, mao si alyas Opaw, 58, walay trabaho ug nagpuyo ra sa nahisgutang dapit.
Nasakmit gikan kaniya ang walo ka gagmay ug 3 ka medium-sized nga pakete sa gituohang shabu nga motimbang og 6.4 gramos nga adunay standard drug price nga P43,520.
Ang maong dinakpan nalutsan og search warrant nga giisyu ni Judge Anacleto Debalucos sa Regional Trial Court branch 17 niadtong Mayo 15, 2025.
Ang Carbon Police Station nga gipangulohan sa hepe niini nga si Police Major Thom Ed Lacaba Taghoy II ni-apply og search warrant sa korte human nila na-kompirmar ang ilang nadawat nga impormasyon mahitungod sa pagtinir og ilegal nga drogas sa maong suspek.
Ang maong operasyon inabagan usab sa Philippine Drug Enforcement Agency (PDEA 7).
Pagka ala 1 pasado sa kadlawon sa Biyernes, Mayo 23, nadakpan ang 24 anyos nga mahuyang nga si alyas Nene atol sa buy-bust nga gipahigayon sa mga sakop sa Abellana Police Station sa may dalan Juana Osmeña, Barangay Kamputhaw.
Si Nene, nga taga Iloilo City apan kasamtangang nagpuyo sa may Barangay Cogon Ramos, giingon’g nag-sideline sa pagpayuhot sa ilegal nga drogas.
Nakuha gikan sa iyang posisyon ang lima ka gagmay’ng pakete sa gituohang shabu nga mobalor og P1,700.
Ang duha ka dinakpan mag-atubang og kasong kalapasan sa Section 5 ug 11 sa Republic Act 9165 kun Comprehensive Dangerous Drugs Act of 2002. / JDG