Napusasan ang 48-anyos nga lalaki nga giila nga high value individual atol sa gipahigayon nga buy-bust sa mga operatiba sa Provincial Intelligence Unit (PIU) sa Cebu Police Provincial Office alas 10:35 sa buntag, Dominggo, Hulyo 20, 2025 sa Sitio Los Feliz, Barangay Bulacao, Siyudad sa Talisay.
Ang nasikop giila nga si Joe Sandy Gustillo Lacson, taga Main Court Subdivision, Barangay Bulacao sa maong dakbayan.
Nakuha gikan kaniya ang lima ka bulto sa gituohang shabu nga motimbang sa 25 gramos nga dunay standard drug price nga P170,000.
Matod sa usa sa mga sakop sa PIU, nga duha ka semana nila gi-monitor si Lacson human migawas ang iyang pangalan nga maoy tigpayuhot sa ilegal nga drugas.
Base sa nakuha nga impormasyon, makabaligya si Lacson og 50 gramos nga shabu matag semana gikan sa iyang amo nga bag-ong laya sa Cebu City Jail.
Ang iyang area of distribution mao ang Barangay Tabunok, Bulacao ug Lagtang, Siyudad sa Talisay.
Samtang nadakpan sab sa Bogo City Police Station ang usa ka 43-anyos nga drug personality sa Barangay Malingin sa maong siyudad alas 3:05 sa kaadlawon, Lunes, Hulyo 21, 2025.
Ang suspek nakuhaan og mga putos sa gituohang shabu nga motimbang sa 1.65 gramos nga dunay balor nga P11,220.
Kasong kalapasan sa Section 5 ug 11, Article II, Republic Act 9165 ang atubangon sa mga suspek. / AYB