Naangol sa mga pagpanunggab ang usa ka batan-ong lalaki nga gitabangan og dunggab sa duha ka mga menor de edad alas 4 sa hapon sa Biyernes, Mayo 17, 2024 sa G.Y Dela Cerna, Brgy. Poblacion, Siyudad sa Lapu-Lapu.
Ang biktima giila nga si Chris Niño Nuñez Aparre, 20 , ulitawo, taga Brgy. Punta Engaño sa mao nga siyudad.
Ang usa sa mga suspek nga 17 anyos nga usa ka John, taga Sityo Langub, Brgy. Poblacion, “naluwas” sa kapulisan sa Lapu-Lapu City Police Police Station 3 ubos sa kamanduan sa ilang station chief nga si P/Maj. Jaypee F Dagami.
Ang iyang kauban nga laing 17 anyos nga giila sa alyas nga Adrian, taga Brgy. Canjulao, gawasnon pa.
Sa pasiunang imbistigasyon nasuta nga ang biktima mao pay pagkanaug sa iyang gisakyan nga PUJ.
Siya gisugat sa duha ka mga suspek ug gitabangan sa pagdunggab.
Ang biktima gidali sa pagdala sa usa ka tambalanan sa Siyudad sa Lapu-Lapu apan gumikan kay grabi, gibalhin sa Vicente Sotto Memorial Center sa Siyudad sa Sugbo,
Giingon nga ang biktima ug mga suspek adunay mainiton nga bangi apan wa gibutyag kon unsa. / DVG