DUHA ka adlaw lang ang milabay human miigo ang sunog sa Sitio Mananga, Barangay Tabunok sa dakbayan sa Talisay niadtong Hunyo 25, gitubag usab kini og laing sunog mga alas 2 pasado sa kaadlawon, Hunyo 27, 2025, sa Sitio Bamboo, White Road, Barangay Inayawan, Dakbayan sa Sugbo, diin kapin 20 ka mga panimalay ang hingpit nga naugdaw.
Dili moubos sa 30 ka mga pamilya o 100 ka mga indibidwal ang apektado sa maong sunog.
Base sa imbestigasyon sa Bureau of Fire Protection kun BFP, nadawat nila ang maong taho alas 3:09 sa kaadlawon ug giisa nila kini sa first alarm pagka-alas 3:14.
Paglabay sa upat ka minutos, giisa ang sunog sa second alarm tungod sa paspas nga pagkatap sa kayo.
Nakontrolar kini sa alas 4:02 ug hingpit nga napawong sa alas 4:27 sa kaadlawon.
Giingon nga nagsugod ang sunog sa tindahan ni Oliver Povadora nga gipatung-an sa mga kabalayan sa maong dapit.
Apan sa pakighinabi ni Povadora, 47 anyos nga Grab driver, kini mibutyag nga imposible’ng naggikan sa iyang tindahan ang sunog sanglit wala kiniy mga “live wire” kay tungod matud pa halos usa ka tuig na niya kining wala gamita.
Midugang usab kini nga adunay nakasulti kaniya nga posibleng gikan sa tapad nga balay nga gihimo’ng paabangan ang kayo.
Sa nahitabong sunog, gikataho nga adunay 23 anyos nga dalaga ang nakaangkon og second-degree burn sa iyang wala nga siko.
Usa ka 15 anyos nga babaye nga estudyante nakaangkon usab og paso sa iyang tiil human miambak sa ikatulo nga ang-ang sa hagdanan.
Si alias Egoy, usa ka buta nga dunay lima ka anak, naluwas sa sunog uban sa mga anak og asawa.
Si Egoy, nga nahinabi sa Superbalita Cebu, miingon nga nakabantay siya nga nagdinaganay ang iyang mga silingan hinungdan nga iyang gipukaw ang iyang asawa og gipasusi sa gawas.
Dinhi nila nahibaw-an nga nasunog na diay ang ilang lugar.
Gitabangan siya og aswat sa duha niya ka anak hinungdan na nakalingkawas sa sunog.
Nagpasalamat siya sa Ginoo kay bisan kun nakan-an sa kayo ilang panimalay luwas iyang pamilya.
Sa pagka-karon, nagpahigayon pa og imbestigasyon ang kabomberohan sa dakbayan aron sutaon unsa ka tinuod ang taho nga faulty wiring ang hinungdan sa sunog.
Gipahimutang na sa Barangay Inayawan Sports Complex ang mga nasunogan. / JDG, GPL