20 mil miapil sa rally sa Davao

Nagsugwak ang mga tawo nga nisalmot sa Solidarity Walk sa Dakbayan sa Davao kagahapong adlawa, Marso 17, 2025, agi og suporta ni kanhi Presidente Rodrigo Roa Duterte nga gipadakop sa International Criminal Court (ICC).

Ang Davao City Police Office (DCPO) nibanabana og kapin sa 20,000 ka suporter sa kanhi presidente ang nagtapok sa San Pedro Square human sa Parada Dabawenyo.

Nagsul-ob sila og itom nga t-shirts nga dunay mensahe, “I stand with FPRRD,” pula nga ribbons gihigot sa ilang mga pulso ug nnagsiyagit og “Duterte,” “Marcos Resign,” ug “Duterte, bring him home.” 

Si Mayor Sebastian “Baste” Duterte nagkanayon nga kon gikonsiderar sa kapulisan ang druga nga makatabang aron nga makalahutay sa taas nga mga oras sa trabaho, apan sa  Davao makaguba kini sa pamilya, komunidad, ug sa mga inosenteng kinabuhi. 

Gipadayag ni Baste nga kini maoy katapusang higayon sa iyang termino isip mayor sa Davao City nga mosalmot sa Araw ng Dabaw kay alang kaniya wala na siya masayod sa umaabot nga sistema sa politika sa Pilipinas. 

Matod ni Baste nga ang mga istorya nga iyang nadunggan bahin sa martial law ug panaugdaog,” is synonymous with the Marcos family name.”

Iyang gidugang nga tanang mga tradisyonal nga politiko dili buot nga mausab ang Pilipinas ug dili sila gusto nga si Rodrigo naa sa gobiyerno tungod kay makompromiso ang ilang mga plano. 

Gitin-aw niini nga si Presidente Ferdinand “Bongbong” Marcos Jr., nga dili gyud higugmaon sa mga tawo. 

“Mr. President Marcos you will never be loved especially who are calling up Rody Duterte’s name. You will never be loved,” matod ni Baste.

Gipahinumdoman ni Baste si Presidente Marcos nga ang iyang amahan maoy nagpalubong kang kanhi Presidente Ferdinand Marcos Sr., sa Libingan ng mga Bayani apan ang gibawos, niabag sa ICC aron prisuhon si Rodrigo. 

Sa pikas bahin, si Senador Christopher “Bong” Go nagkanayon nga kon nahimo sa Pilipinas ang pagdala kang Rodrigo ngadto sa The Netherlands, mahimo sab nila kining madala pauli dinhi.

Iyang gidasig ang tanang Pilipino nga dili mohunong hangtod nga dili mahiuli dinhi si Rodrigo nga gihulagway niyang iya nga walay sala ug naghimo lang sa iyang trabaho. /