Nanggawas sa ilang tagsatagsa ka panimalay ang homeowners sa Casa Mira South Subdivision kauban ang ilang mga pamilya ug ningsalmot sa paugnat sa kusog nga CMS Fun Run 2025 niadtong Dominggo, Hunyo 1, nga gipahigayon sulod mismo sa subdivision.
Ang fun run nga anaa na sa ikaduhang tuig nga pagpahigayon, tipik sa mga kalihukan sa umaabot nga piyesta sa maong dapit.
Ning higayuna, ang fun run nakadani og kapin 200 ka mga partisipante sa 5-kilometro, 3K, ug 2K nga mga kategoriya.
Ang mga partisipante nituyok sulod sa lugar sa subdivision nga nahiluna sa Dakbayan sa Naga ug Lungsod sa San Fernando, Sugbo.
Gipasiugdahan kini sa Board of Directors sa Home Owners Association, ug ang tumong niini mao ang pagpalambo sa himsog nga panglawas ug paghiusa sa komunidad.
Sa raffle draw, tulo ka suwerteng mga partisipante ang nakadaog og bag-ong pares sa sapatos pangdagan nga gi-sponsor sa 24 Shot Clock. / RSC