200 ka ACMs gubaon
Kapin 200 ka automated counting machines (ACMs) ang gipulihan tungod sa teknikal nga mga deperensya ug uban pang problema nga nakaapekto sa nagpadayong 2025 national ug local elections sa Pilipinas.
Sa usa ka interbyu sa mga tigbalita, giingon ni Commission on Elections (Comelec) chairman George Garcia nga iyang gisugo ang daliang pag-ilis sa mga naguba nga makina aron malikayan ang dugang kalangan sa pagboto.
“Mayroon tayong more or less 200 machines na kinakailangan palitan. Hindi naman huminto pero napapansin namin nakaka-dalawang beses nag-reject,” batbat ni Garcia.
“Kaagad nga nagdesisyon ang among operations center nga kuhaon ang mga deperensyadong makina ug pulihan kini og bag-o aron dili pa mudako ang problema.”
Sa Mandaluyong City, tulo ka ACMs ang napakyas sa pag-operate samtang lima usab ka makina ang wala molihok sa Lahug Elementary School.
Aduna usab mga report sa naguba nga VCMs sa Meycauayan City ug sa probinsya sa Batangas.
Matod ni Garcia, ang Comelec adunay 16,000 ka extra nga VCMs nga andam ipuli kon adunay maguba.
Sa Guadalupe Elementary School sa Cebu City, usa ka presinto ang nihunong pagpasud sa mga official ballot ngadto sa ACM tungod kay nag paper jam.
Si kanhi Cebu City mayor Michael Rama nga nidagan pagka mayor mao mismo ang nakasinati human ang ACM sa iyang presinto ang nag paper jam.
Didto sa Guadalupe Elementary School siya nibutar.
Si Rama kauban sa ubang mga botante nagpaabot og 30 minutos dihang ni-function na pagbalik ang ACM.
Sa Mandaue City, duha ka ACMs sa managlahi nga polling center - sa Barangays Cabancalan ug Subangdaku ang nakasinati og malfunctioning ug wa mobasa sa mga balota.
Kini niresulta sa pagpaabot sa mga senior citizen og dugay imbes nipahimulos sila sa sayong pagbukas sa botasyon.
Si Department of Education Supervisor Official (Deso) technical support staff Lannie Balase nagkanayon nga ang hinungdan mao nga basa pa ang tinta dihang gisud ang mga balota sa makina.
Sa Robinsons Galleria, ang ubang polling precincts nakasinati og problema tungod sa overshading ug pagpilo sa mga balota.
Laing presinto nakasinati og kalangay tungod kay ang ACM wa matarong og set up. / TPM / SunStar Philippines / EHP / CAV