Personal nga gibisita ni Mandaue City Mayor Thadeo “Jonkie” Ouano ang karaang North Bus Terminal sa Barangay Subangdaku human nadiskubrihan nga kapin usa ka tuig nang wala makolekta ang makatakod nga medical waste gikan sa Mandaue City Hospital (MCH).
Ang lugar mao ang kasamtangan nga gibutangan sa mga medical waste.
Si Mayor Ouano nibisita sa lugar human sa mga report nga adunay mga pamilya nga nabalhin tungod sa sunog ang nagpuyo duol sa gitipiganang basura.
Sa pagkakaron, mokabat sa 200 ka drum sa infectious ug hazardous waste ang gitipigan sa terminal, lakip na ang gigamit nga syringes, nabasa sa dugo nga bendahe, ug kontaminadong medical supplies.
Gikumpirmar sa mga opisyal nga ang terminal nahimong temporaryong tipiganan sa medical waste gikan sa MCH, City Health Office, ug mga barangay health centers nga nagsugod pagtapok sa 2024.
Bisan pa sa kabalaka, gipasalig sa mga opisyal nga kanunay kining gi-disinfect ug hugot nga gitipigan.
Gimando ni Ouano ang dinalian nga pagbutang og babag tali sa gitipiganang basura ug sa temporaryong puy-anan sa mga nasunogan, ilabi na alang sa kaluwasan sa mga bata.
Matod ni Araceli Barlam, pangulo sa City Environment and Natural Resources Office (Cenro), dili direktang responsibilidad sa ilang buhatan ang paglabay sa medical waste sa MCH, tungod kay kinahanglan unta nga aduna kini kaugalingong third-party hauler.
Apan nitabang ang Cenro human nihangyo ang MCH sa miaging tuig tungod sa kakuwang sa luna.
Ang pagtipig sa basura nagsugod sa 2022 human natapos ang kontrata sa miaging waste hauler.
Na-identify na ang bag-ong service provider apan nagpaabot kini sa Permit to Transport.
Naglaom si Barlam nga sugdan ang paghakot sa basura sa sunod semana.
Gipasalig sab niya nga kanunay nga gi-disinfect ang mga basura. / CAV