Giaprobahan sa Hunta Probinsyal sa ikatulo ug uwahing pagbasa ang gisugyot nga 2026 Children’s Code sa Probinsiya sa Sugbo atol sa sesyon niini sa Lunes, Agusto 17, 2026.
Kini aron pagseguro nga mahan-ay ang sistema sa paghatag og proteksyon og paghimo og luwas nga palibot alang sa mga bata.
Ang maong ordinansa gipangamahanan ni Board Member Lakambini “Neneth” Reluya nga nag-establisar sa usa ka komprehensibo nga framework nga maghatag og proteksyon ug mag-promote sa katungod, welfare, ug development sa mga bata sa lalawigan.
“The code upholds children’s rights to survival, development, protection, and participation, while strengthening measures against abuse, neglect, exploitation, trafficking, child labor, discrimination, online abuse, and other threats to their safety and well-being,” saysay sa lagda.
“The ordinance also strengthens reporting and case management mechanisms, support for children in need of special protection, and juvenile justice and welfare interventions, with the best interests of the child as the guiding principle,” dugang niini.
Gilatid sab niini ang responsibilidad sa mga ginikanan, komunidad, tunghaan, lokal nga kagamhanan, ug uban pa’ng stakeholders aron maseguro nga aduna kini insaktong programa'ng mag-promote sa usa ka inclusive ug child-friendly environment.
Una na nga nipadayag ang Hunta Probinsyal lakip si Cebu Governor Pamela Baricuatro og kabalaka sa mga tinun-an ug mga bata sa probinsiya tungod sa sunodsunod nga insidente sa pagpamusil ug hulga sa mga tunghaan sa nasud. / ANV
