Sa dakbayan sa Lapu-Lapu, kon naa ka sa gawas balay, pagsul-ob og senina aron di ka dakpon sa polis.
Sukad sa miaging tuig, ang mga sakop sa Lapu-Lapu City Police Office (LLCPO) nanakop sa mga tawo nga naghukas og senina nga maglakaw sa kadalanan.
Sukad sa Oktubre 22-28, 2023, ang LCPO nakasikop og 208 ka “half naked” nga mga tawo nga nagsurosuroy ug girekord sa police station.
Way ordinansa ang Siyudad kalabot niini, apan si LCPO police director Col. Elmer S. Lim, sa sayo pa, nipasabot nga kamandoan kini sa iyang mga labaw sa kapulisan aron mabadlong ang si bisan kinsa nga mag topless, inay magsul-ob og senina sa ingon desente nga tan-awon.
Gawas niini, nakasikop usab ang kapulisan og 142 ka mga menor sa paglapas sa curfew ordinance nga hugot nga gipatuman sa Siyudad sukad sa panahon sa pandemic.
Mokabat usab og 582 ka mga tawo ang nangasikop sa pagpanigarilyo sa publikong lugar sa samang mga petsa.
Estrikto usab ang kapulisan sa pagpatuman sa balaod sa pag-inom sa publikong mga lugar, diin sila nakasikop og 105 ka mga tawo samtang unom ang nadakpan tungod sa pag karaoke lapas sa oras nga gitugot ubos sa ordinansa.