20K ka mga kahoy gitanom sa DepEd 7

KAHOY: Dungan nga gipa­higayon sa tibuok nasod ang pagpananom og mga kahoy sa mga maestra ug mga tinun-an sa Dept. of Education (DepEd) isip kabahin sa pagtuman sa saad ni Bise Presidente Sara Duterte.
KAHOY: Dungan nga gipa­higayon sa tibuok nasod ang pagpananom og mga kahoy sa mga maestra ug mga tinun-an sa Dept. of Education (DepEd) isip kabahin sa pagtuman sa saad ni Bise Presidente Sara Duterte. DepEd Philippines FB page

Sa diwa sa Pasko, ang Department of Educa­tion (DepEd 7) mita­nom og mga 20,000 ka punoan sa kahoy sa tibuok rehiyon aron iuli ngadto sa kinaiya­han niadtong Miyer­ku­les, Disyembre 6, 2023.

Ang programa kabahin sa dungan ug nationwide tree-planting activity nga gitawag og “236,000 Trees – A Christmas Gift for the Children.”

Sa Nob. 17 nga me­morandum, si Bise Pre­sidente ug Education Se­cretary Sara Duterte nitahas sa 47,678 ka mga publikong eskwelahan sa tibuok nasod sa pagpahigayon og synchronous mode alang sa tree-planting activities.

Sa interbyo niadtong Martes, Disyembre 7, ang direktor sa DepEd-7 nga si Dr. Salustiano Ji­menez miingon nga ang maong programa gisalmutan sa halos 4,000 ka mga pampublikong tunghaan sa rehiyon.

Sa probinsya pa lang sa Sugbo, si Jimenez niingon nga adunay kapin sa 1,400 ka mga pampublikong tunghaan ang nisalmot sa pagpananom og dul-an sa 7,400 ka mga kahoy. Hinuon, ang mga gitanom nga kahoy mahimong moabot ngadto sa kapin sa 10,000 sa tibuok Cebu Island kon iapil ang mga numero gikan sa City Division, dugang niya.

Ang matag eskwelahan adunay mga partisipante nga dili molapas sa 10 ka magtutudlo ug dili molapas sa 20 ka mga estudyante matag eskwelahan nga mananom og dili mominus lima ka mga kahoy.

Si Jimenez niingon nga ang mga punoan sa prutas gitanom sulod sa nataran sa eskwelahan, apan kon dili igo ang luna, kini gitanom sa hawan nga dapit duol sa mga eskwelahan sama sa mga lokal nga parke, o marine protected area.

Dugang pa niya nga ang mga punoan sa kahoy gikan sa Department of Environment and Natural Resources (DENR) ug sa local government units.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph