Patay diha-diha ang usa ka 21 anyos nga lalaki human pusila sa wala pa mailhi nga mamumuno ala 1:30 sa kaadlawon, Dominggo, Mayo 18, 2025, sa dalan Tres de Abril, Barangay Labangon, Siyudad sa Sugbo.
Ang biktima giila nga si Mark Vincent Carabuena, taga Sitio Cogon, Barangay Labangon.
Sa gihimong imbestigasyon sa Labangon Police Station, dunay samad pinusilan sa lawas ang biktima nga maoy hinungdan sa iyang kamatayon.
Tulo ka basiyo sa bala sa 9mm ang nakuha sa mga sakop sa City Forensic Unit gikan sa crime scene.
Nagpadayon pa sa ilang imbestigasyon ang Labangon Police Station aron ilhon ang naghimo sa krimen ug ang motibo niini.
Lakip sa ilang subayon ang background sa biktima.
Gipangsubay na sa kapulisan ang mga kuha sa CCTV camera duol sa dapit sa nahitabuan nga maoy makatabang sa ilang gihimo nga imbestigasyon. / AYB