Moabot sa 21 ka lainlaing kalibre sa armas nga ni expired na ang mga papeles ang gitahan sa 21 ka mga gun holder sa Guadalupe Police Station alang sa safekeeping human sa duha ka adlaw nga Oplan Katok gikan sa Marso 13-14, 2025, nga gipangulohan sa hepe niini nga si Police Major Miles Damoslog.
Ang maong mga armas gidokumento dayon sa Guadalupe Police Station 9 samtang gipadayon pa ang pagproseso sa mga lisensya niini sa Philippine National Police.
Gipasalamatan ni Police Colonel Enrico Figueroa, hepe sa kapulisan sa Dakbayan sa Sugbo, ang maong mga gun holder nga nisanong sa ilang gihimong Oplan Katok.
Nisaad si Figueroa nga ilang iuli ang maong mga armas kon makumpleto na ang tanang rekisitos sa pag-renew niini.
Dugang ni Figueroa nga magpadayon pa ang ilang paghingusog sa pagsakmit sa mga loose firearms subay sa kamanduan ni Police Brigadier General Redrico Maranan, hepe sa Police Regional Office 7, ilabi na karon nga nagkaduol na ang midterm national ug local elections sa Mayo 12, 2025.
Tinguha sa Cebu City Police Office (CCPO) nga magmalinawon ang election ug safety ang mga botante.
Nanawagan ang CCPO sa ubang mga gun holder kansang lisensya sa armas ni-expired na nga labing maayo nga itahan kini sa police station duol sa ilaha.
Gitataw sa CCPO nga ila pang tabangan ang mga gun holder sa pagpadali sa paglihok sa ilang mga papeles og walay kaso nga ipahamtang batok kanila.
Nibahad si Figueroa nga kon magmagahi ang uban sa pagsanong sa ilang Oplan Katok, mapugos sila sa pagkuha og search warrant gikan sa korte aron kompiskahon ang ilang armas og posible pa silang makasuhan. / AYB